ShQO-da tutynýshylarǵa óz quqyǵyn qorǵaýdy úıretetin sheberlik-saǵat ótti
«Qazaqstan tutynýshylar lıgasy» qaýymdastyǵy» zańdy tulǵalar birlestiginiń basqarma tóraǵasy Svetlana Romanovskaıa Óskemen qalasynda sheberlik saǵatyn ótkizdi. Sharaǵa óńirdegi úkimettik emes uıymdar ókilderi, qoǵamdyq keńesterdiń músheleri jáne jastar qatysty.
Sheberlik-saǵat baǵdarlamasy úsh taqyryptan turdy: taýarlardy, qyzmetterdi jáne jumystardy satyp alýǵa sanaly kózqarasty qalyptastyrý úshin tutynýshylardyń quqyǵyn qorǵaý aspektileri; medıatsııa – tutynýshylar men kásipkerler arasyndaǵy daýlardy sheshý quraly retinde; lobbılendirý – halyqtyń áleýmettik osal toptary men qaýymdastyqtarynyń múddelerin ilgeriletý. Qatysýshylar Qazaqstannyń árbir azamaty úshin ózekti bolyp tabylatyn eń mańyzdy suraqtarǵa jaýap aldy. Máselen, turǵyn úıdi basqarýdy PIK-ten MIB-ke, ıaǵnı turǵyn úı ıelerine berý joldary, erli-zaıyptylar, týystar, bıznes-seriktester arasynda týyndaǵan janjaldy jaǵdaılardy sottyń aralasýynsyz sheshý joldary aıtyldy. Sondaı-aq tutynýshy retinde óz quqyǵyńdy qorǵaý jáne durys talap qoıý tásilderi, tutynýshylyq daýlardy sotqa deıingi tártippen kim jáne qalaı sheshedi, jábirlenýshiniń ólimine nemese densaýlyǵyna aýyr zııan keltirýge ákep soqpaǵan aýyr qylmys úshin qylmystyq jazadan zań boıynsha kim qutyla alady, medıatsııa rásimine qandaı qylmystar kirmeıdi degen máseleler sóz etildi.
Buǵan deıin sheberlik-saǵat E.A. Bóketov atyndaǵy Qaraǵandy ýnıversıtetinde jáne elordadaǵy L.N. Gýmılev atyndaǵy Eýrazııa ulttyq ýnıversıtetinde uıymdastyrylǵan bolatyn. Aldaǵy ýaqytta tutynýshylyq bilim berý akademııasy Petropavl, Aqtaý, Pavlodar, Semeı, Shymkent, Taraz jáne Almatyda oflaın jáne onlaın formatta ótedi.
«Taýarlar men qyzmetter naryǵyndaǵy tutynýshylardyń quqyqtary kún saıyn buzylady jáne shaǵymdardyń kóbi josyqsyz kásipkerlerdiń úlesine tıedi. Adamdar óz ustanymyn belsendi túrde jarııalap, zańdy quqyǵyn saqtaýdy talap ete bastady. Sondyqtan biz «Tutynýshylyq bilim berý akademııasy» jobasyn iske qostyq. Onyń negizgi maqsaty – tutynýshylardyń óz quqyǵy men zańdy múddelerin qorǵaý máselelerinde quqyqtyq saýattylyǵyn arttyrý», - dedi Svetlana Romanovskaıa.
Óz sózinde ol 30 jyldan astam ýaqyt boıy adam quqyǵyn qorǵaýmen aınalysatynyn jáne kún saıyn oǵan tutynýshylar kómek surap júginetinin aıtty.
«Tutynýshylarmen ońaı baılanys ornatý úshin biz Telegram-arnasyn iske qostyq. Munda siz ózińizdi mazalaǵan problemalarmen bólise alasyz jáne tutynýshylar buryn kezdesken uqsas jaǵdaılar týraly aqparat ala alasyz. Sonymen qatar bizdiń mamandardan keńes alý úshin aldyn ala jazyla alasyz. Tek óz quqyǵyńyzdy naqty bilý jáne olardy qoldana bilý taýarlar men qyzmetter naryǵyndaǵy jaǵdaıdy retteýge kómektesedi», - dedi S. Romanovskaıa
Aıta keteıik «Qazaqstan tutynýshylar lıgasy» qaýymdastyǵy» ZTB el aýmaǵynda usynylǵan ónimderdiń, jumystar men kórsetiletin qyzmetterdiń sapasyna qoǵamdyq baqylaýdy júzege asyratyn úkimettik emes uıym. Ol 31 jyl boıy óz qataryndaǵy 60 111 adamnyń quqyqtaryn qorǵaıdy. Osy ýaqyt ishinde Qazaqstan tutynýshylar lıgasy tutynýshylarǵa 100 860 906 898 teńge somasyna materıaldyq jáne moraldyq zalaldy óteýge kómektesti.