ShQO-da turmysy tómen 2700-den astam otbasy úıiniń jylytý maýsymyna daıyndyǵy tekserildi

ÓSKEMEN. QazAqparat – Shyǵys Qazaqstan oblysynda turmysy tómen 2700-den astam otbasy turatyn úılerdiń jylytý maýsymyna daıyndyǵy tekserildi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńir qutqarýshylary jylytý maýsymyna daıyndyq jumystaryn bastady. Birinshi kezekte kópbalaly jáne turmysy tómen otbasylardyń, múmkindigi shekteýli jandar men qarttardyń úıleri baqylaýǵa alynǵan.

«1 tamyzdan bastap qutqarýshylar jylytý kezeńindegi qaýipsizdik sharalaryn túsindirý úshin áleýmettik turǵyda osal sanattaǵy otbasylardyń 2700-den astam úıin aralap shyqty. Peshti qys mezgiline qalaı daıyndaý kerektigi jáne ony úıde órt shyǵarmaı qalaı qaýipsiz jaǵý qajettigi týraly nusqaýlyqtar berildi», - delingen aqparatta.

Áleýmettik qorǵalmaǵan azamattardyń turǵyn úılerin tolyq teksergennen keıin TJD mamandary ekinshi kezeńdi bastamaq. Onda ýly gazdy anyqtaıtyn datchıkter ornatylady.

«Mundaı datchıkter jaqsy nátıje berip otyr. Sońǵy úsh jylda osy qurylǵylar 7 ret iske qosylyp, nátıjesinde 30 adam, onyń ishinde 23 bala qutqaryldy», – dep atap ótti departament bastyǵynyń orynbasary Serik Amangeldın.

Oblysta jyl basynan beri órt qaýipsizdigi erejelerin saqtaý saldarynan 306 pesh órtengen. Aqaýy bar peshti qoldanǵan 9 azamatqa ıis tıdi.