ShQO-da turmysy tómen 1500 otbasynyń úıine ýly gaz datchıgi ornatyldy
ShQO Tótenshe jaǵdaılar departamenti baspasóz qyzmetiniń málimetine súıensek, óńir qutqarýshylary erekshe shara ótkizdi. Olar kópke tanymal «Taqtar oıyny» fılmindegi eń tanymal «qys taıady» sózin qoldana otyryp, kezekti reıdke attandy. Bundaǵy maqsat – turǵyndardy qaýipsizdik erejelerin qatań saqtaýǵa shaqyrý.
«Aralaý kezinde órt qaýpi joǵary úıler anyqtaldy. Qutqarýshylar kóptegen buzýshylyqtarǵa jol berilgen turǵyn úılerge qyzyl tústi «alaý« belgisin jabystyrdy. Al sary tústi «alaý«- bul úı qaýipti, biraq buzýshylyqtardy joıý áli kesh emes degendi bildirse, jasyl «alaý« – barlyq talaptarǵa saı úılerge jabystyrylǵan. Qutqarýshylar halyqqa «qys taıaǵanyn« jáne qazirdiń ózinde qaýipsizdikti qamtamasyz etý kerektigin eskertti», - delingen aqparatta.
Sondaı-aq departament mamandary 1500-den astam áleýmettik osal toptaǵy otbasylardyń úılerine ýly gaz datchıgin ornatty. Ótken jylytý maýsymynda osyndaı datchıkterdiń arqasynda 23 adam, onyń ishinde 17 bala qutqarylǵan.