ShQO-da túrme mańyna esirtki kómgen er adam jazalandy

ÓSKEMEN. QazAqparat – Shyǵys Qazaqstan oblysynda qatań tártiptegi túzetý mekemesiniń mańynda 90-ǵa jýyq esirtki dozasyn jerge kómip ketken er adam qoǵamdyq jumysqa tartyldy, dep habarlaıdy QazAqparat tilshisi.

ShQO boıynsha QAJ departamenti baspasóz qyzmetiniń málimetine súıensek, sottalýshy Glýbokoe kentinde jabaıy soranyń birneshe butasyn julyp alyp, ony jeke paıdalaný úshin keptirgen. Esirtkini úsh túrli polıetılen paketke salǵan er adam ony Óskemen qalasyna alyp kelip, qaýipsizdigi joǵary túzetý mekemesi mańyna jasyrdy. Osylaısha, ol 90-ǵa jýyq dozany jerge kómgen.

Polıtsııa qyzmetkerleri er adamdy kezekti dozany jasyrý úshin jerdi qazyp jatqan kezde ustady. Saraptama qorytyndysyna sáıkes, tárkilengen zattyń «keptirilgen marıhýana» ekendigi dáleldendi.

Óskemen qalalyq sotynyń úkimine sáıkes 40 jastaǵy aıyptalýshy QR Qylmystyq kodeksiniń 296-baby 3-bóligimen kináli dep tanyldy. Oǵan esirtki zattaryn zańsyz saqtaǵany úshin 100 saǵattyq qoǵamdyq jumysqa tartý túrinde jaza taǵaıyndaldy. Belgili bolǵandaı, ol buǵan deıin de birneshe ret qylmystyq jaýapkershilikke tartylǵan.

«Sottalǵan azamat probatsııaǵa esepke qoıylyp, turǵylyqty jeri boıynsha qoǵamdyq jumystardy óteý úshin jiberildi. Er adamǵa avtobýs aıaldamalarynda qoqys jáshikterin tazalaý boıynsha jumys taǵaıyndaldy. Sonymen qatar probatsııa qyzmetkerleri oǵan qoǵamdyq jumystardan jaltarǵan jaǵdaıda, qamaýǵa alynatyndyǵy týraly túsindirdi», - dedi Úlbi aýdandyq probatsııa qyzmetiniń mamany Nazgúl Batyrhanova.