ShQO-da Tuńǵysh Prezıdent kúnine arnalǵan kórme ashyldy
Tuńǵysh Prezıdent kúnine oraı ShQO qoryq-mýzeıinde «Qazaqstan joly. Tarıhtaǵy tulǵanyń róli» atty kórme ashyldy. Kórmeniń negizin 2007 jyly Tuńǵysh Prezıdent Mýzeıiniń syıǵa bergen eksponattary qurap otyr.
Bul memlekettiń damý tarıhyn, Elbasy Nursultan Nazarbaevtyń qyzmetin kórneki kórsetetin kitaptar serııasy, albomdar, sırek kezdesetin fotoqujattar.
Oblystyq mýzeı-qoryqtyń qyzmetkeri Gúlbaqyt Baltabekova kórme eksponattary týraly egjeı-tegjeıli aıtyp berdi.
«Ekspozıtsııa qazaqstandyq qoǵamtanýshylardyń ádebıetine, Elbasynyń eńbekterine baı. Eksponattardyń ishinde Ermuhamet Ertisbaevtyń «Qazaqstan jáne Nazarbaev: ózgeris logıkasy» atty týyndysy bar. Onda Tuńǵysh Prezıdentiniń ómirbaıany – balalyq jáne jastyq shaǵy, qyzmeti, qaıta qurý kezeńindegi saıası ustanymy, prezıdenttik kezeńi baıandalǵan. Sondaı-aq kórmege Qazaqstannyń Tuńǵysh Prezıdentiniń «Qazaqstan joly», «Eýrazııa júreginde», «Tarıh tolqynynda» atty kitaptary qoıyldy. Olar elimizdiń, qazaq halqynyń tarıhynda bolǵan qıyn-qystaý sátter, ózgerister men oqıǵalar týraly baıandaıdy», - dedi ol.
Eksponattardyń ishinde memlekettiń birinshi basshysynyń sırek kezdesetin fotosýretteri bar. Jalpy, «Qazaqstan joly. Tarıhtaǵy tulǵanyń róli» kórmesi 70-ten astam eksponattardan turady.
Aıta keteıik, kórmeni jeltoqsan aıynyń sońyna deıin tamashalaýǵa bolady.