ShQO-da túlekterdiń sheteldik JOO-larǵa ketýin eki ese azaıtý kózdelip otyr

ÓSKEMEN. QazAqparat – Shyǵys Qazaqstan oblysynda mektep túlekteriniń sheteldik ýnıversıtetterge túsýi azaıyp keledi, dep habarlaıdy QazAqparat.

Bul jaıly ShQO óńirlik kommýnıkatsııalar qyzmetinde ótken baspasóz konferentsııasynda oblystyq bilim basqarmasynyń basshysy Saırangúl Jumadilova málim etti.

Onyń aıtýynsha, basqarmanyń negizgi baǵyttarynyń biri – túlekterdiń sheteldik joǵary oqý oryndaryna ketýin azaıtý. Óńirdegi ýnıversıtetterdiń básekege qabiletin arttyrýǵa baǵyttalǵan «Bilikti maman» jobasy júzege asyrylýda. Oblysta 2017 jyldan bastap respýblıkadan bólek qosymsha bilim granttary bólinýde. Sol jyly – 200, 2018 jyly – 446, 2019 jyly – 400 grant bólingen. Nátıjesinde jergilikti bıýdjet esebinen 1046 stýdent joǵary oqý oryndarynda bilim alýda.

Túlekterdiń sheteldik joǵary oqý oryndaryna ketýi aıtarlyqtaı azaıyp keledi. 2016 jyly Shyǵys Qazaqstannan - 1800 adam, al 2019 jyly - 535 adam basqa memleketterge oqýǵa ketken. Al bıyl bul kórsetkishti 2 ese azaıtý kózdelip otyr.

«Biz ár ýnıversıtetpen tyǵyz baılanystamyz. Jylyna 600 stýdent oqý bitiredi. Joǵary oqý oryndarynyń rektorlary túlekterdiń kem degende 90%-y mamandyq boıynsha jumyspen qamtamasyz etilýine múddeli bolýy kerek. Osynyń negizinde olarǵa memlekettik tapsyrys beriledi. Eger stýdentter jumyspen qamtylmasa, onda memlekettik tapsyrys bolmaıdy. Grant qajetti mamandyqtarǵa beriledi, biraq balalar qaıda baratynyn ózderi tańdaıdy. Mysaly 100 úmitker S.Amanjolov atyndaǵy ShQMÝ-ǵa túskisi kelse, grantty sol ýnıversıtetke bólemiz», - dedi Saırangúl Jumadilova.