ShQO-da tótenshe jaǵdaıda 17 myńnan astam adamdy ýaqytsha ornalastyratyn pýnktter ázirlendi
Óskemendegi Aımaqtyq kommýnıkatsııalar qyzmetinde ótken baspasóz máslıhatynda kóktemgi sý tasqyny kezeńine daıyndyq jumystary jaıly sóz etildi. ShQO Jolaýshy kóligi jáne avtomobıl joldary basqarmasynyń basshysy Nurjan Jumadilovtyń aıtýynsha, oblystyq mańyzy bar tasjoldarda 1634 sý ótkizý qubyry men 90 kópir bar.
«Sý tasqynyn boldyrmaý úshin tasjoldardaǵy sý ótkizý qubyrlaryn muzdan tazartý jumystary kúndelikti júrgizilip jatyr. Atap aıtqanda, «Úlken-Naryn-Kúrshim», «Óskemen-Tarǵyn-Samar», «Vasılevka-Bozanbaı», «Alǵabas-Tarǵyn», «Oktıabr ótkeli-Altaıka-Novo-Haırýzovka», «Altaıka-Chapaevo» «Kúrshim-Qaljyr-Býrabaı-Maralıha» joldary. Sý ótkizgish qubyrlardaǵy muzǵa qarsy qoldanylatyn 30 tonna tehnıkalyq tuz satyp alyndy», - dedi ol.
Qutqarýshylardyń sý tasqynyna daıyndyǵy týraly ShQO TJD tótenshe jaǵdaılardyń aldyn alý basqarmasy bastyǵynyń mindetin atqarýshy Dına Beksultanova aıtyp berdi.
«1 aqpannan bastap oblys ákiminiń ókimimen joǵary daıyndyq rejımi jarııalandy. Jaǵdaı qıyndap ketse jergilikti atqarýshy organdar men azamattyq qorǵaý qyzmetteri quralymdarynan 2 334 adam, 735 tehnıka, 50 júzý quraly men 223 motopompa jumyldyrylady. Sý tasqyny saldaryn joıý jáne halyqty evakýatsııalaý úshin departamentte 26 ótimdiligi joǵary tehnıka bar», - deıdi D.Beksultanova.
Óńir boıynsha qalalar men aýdandardyń ákimdikterimen tótenshe jaǵdaı kezinde 17 myńnan astam adamdy ýaqytsha ornalastyrýǵa bolatyn 153 pýnkt ázirlendi.