ShQO-da taýǵa shyǵatyn týrısterdiń qaýipsizdigi úshin mobıldi qosymsha ázirlenbek
ShQO Tótenshe jaǵdaılar departamenti baspasóz qyzmetiniń málimetine súıensek, óńir qutqarýshylary týrıstik saıahat kezindegi qaýipsizdik máselesin kóterdi. Oblystyq Kásipkerler palatasy alańynda onlaın formatta ótken dóńgelek ústelge týrıstik fırma ókilderi qatysty.
«Karantın kezinde ishki týrızm damı tústi. Ulttyq parkter men qoryqtarǵa kelýshiler sany artýda. Taýly ári jetýi qıyn marshrýttar halyq arasynda tanymal. Alaıda kóptegen azamattar saıahatqa tıisti daıyndyqsyz barady. Qutqarýshylardyń aýa raıynyń nasharlaýy týraly eskertýlerin elemeıdi jáne «112« qyzmetine ózderiniń qozǵalys baǵyty týraly habarlamaıdy», - dedi departamenttiń TJ aldyn alý basqarmasynyń bastyǵy Alekseı Shtykel.
Osynyń saldarynan qutqarýshylarǵa qıyndyqqa tap bolǵan týrıster jaıly aqparat óte kesh jáne naqty koordınatsyz keledi. Sóıtip, TJD qyzmetkerleri kómekke jyldam jete almaıdy.
«Sondyqtan týrısterdiń qaýipsizdigin qamtamasyz etý úshin naqty sharalar keshenin usynamyz. Atap aıtqanda, statsıonarlyq jáne baqylaý-qutqarý beketterin salý, biryńǵaı aqparattyq habarlandyrý jelisin uıymdastyrý qajet. Sondaı-aq arnaıy mobıldi qosymsha ázirlep, saıahatqa shyqqandardyń geolokatsııalyq derekterin TJM aýmaqtyq bólimshelerine berý kerek», - dedi A. Shtykel.