ShQO-da taý-ken óndirý kásiporny 182 qyzmetkerine 9 aılyq qaryzyn ótedi - prokýratýra
ShQO prokýratýrasy baspasóz qyzmetiniń málimetine súıensek, azamattardyń eńbek quqyqtaryn qorǵaý, kásiporyndardyń jalaqy boıynsha bereshekti tóleýi erekshe baqylaýda. Zań buzǵan kásiporyndardy ýaqtyly anyqtaý maqsatynda kúndelikti monıtorıng júrgiziledi. Sonyń nátıjesinde, «Vostokshahtostroı» AQ qyzmetkerlerine jalaqy boıynsha bereshekti tóleý máselesi sheshildi.
«Kásiporyn ıesiniń sońǵy 9 aıda 182 qyzmetkerge qaryzy 125 mln teńgege jetken. Qabyldanǵan tıisti sharalardyń arqasynda bul soma olarǵa 24 aqpanda tolyqtaı tólendi. Eńbek zańnamasyn buzǵany úshin «Vostokshahtostroı» AQ basshysy ákimshilik jaýapkershilikke tartylyp, 2,9 mln teńge kóleminde aıyppul tóleýge mindetteldi», - delingen aqparatta.
Sondaı-aq, búgin Óskemen qalasy prokýratýrasynyń basshylyǵy osy kásiporynnyń eńbek ujymymen kezdesý ótkizdi. Qyzmetkerlerge jumys ornynda alǵan jaraqattary úshin tıesili járdemaqylardyń, zeınetaqy, áleýmettik aýdarymdar men medıtsınalyq saqtandyrý tólemderiniń tolyq kólemde jáne ýaqtyly tólenýi kerektigi jóninde túsindirildi.