ShQO-da taý betkeılerindegi qar qarqyndy erı bastady

<p>ASTANA. KAZINFORM &ndash; Shyǵys Qazaqstan oblysynda gıdrotehnıkalyq qurylystar shtattyq rejımde jumys istep tur. Bul týraly ShQO Tótenshe jaǵdaılar departamenti tótenshe jaǵdaılardyń aldyn alý basqarmasynyń mamany Aıaýlym Kekıeva aıtty.</p>

«Qazirgi ýaqytta Shyǵys Qazaqstan oblysynyń ortasha taýly aımaqtarynda jáne olardyń ońtústik betkeılerinde qar jamylǵysynyń qarqyndy erýi baıqalady. Sondyqtan taý ózenderiniń sý deńgeıi kóterilýi múmkin. Jalpy, oblystyń soltústik, soltústik-shyǵys jáne shyǵys óńirlerinde sý tasqyny bolýy yqtımal. Barlyq gıdrotehnıkalyq qurylystar shtattyq rejımde jumys istep tur. Gıdrologııalyq beketterdegi sý synı deńgeıden tómen», - dedi ol Ortalyq kommýnıkatsııalar qyzmetindegi brıfıngte.

Onyń atap ótýinshe, taýly aımaqtarǵa aerovızýaldy tekserý júrgizilip jatyr.

«Jergilikti atqarýshy organdar men utqyr toptar sý tasqyny ýchaskelerine baqylaý júrgizedi. Nátıjesin oblystyq shtabqa jetkizedi. Oblys ákiminiń tapsyrmasymen arnaıy is-sharalar jospary bekitilgen. Ózenderdiń túpterin tereńdetý, arnalaryn bekitý, qum salynǵan qaptardy tóseý jumystary istelip jatyr», - dedi Aıaýlym Kekıeva.