ShQO-da synyptasy kózine qalam tyǵyp alǵan oqýshyǵa Reseıde ota jasalmaq
Katonqaraǵaı aýdany Shyńǵystaı orta mektebindegi 4-shi synyp oqýshysy Erkeǵalı Nurlannyń kózine synyptasy oınap otyryp abaısyzda qalamnyń ushyn tyǵyp aldy. Eki bala arasynda eshqandaı janjal bolmaǵan. Búgingi tańda ákesi Serik Ákimbaev ulyn kórshiles Reseı eline aparyp emdetý úshin qarajat jınap júr.
«Negizinen bul oqıǵa byltyr bolǵan. Alaıda endi ǵana halyq nazaryna ilinip otyr. Kózine zaqym kelgen Erkeǵalıǵa el-jurt kómek kórsetip jatyr. Mektep ujymy da zardap shekken oqýshynyń otbasyna qoldaý tanytýda. Oqys oqıǵa bolǵan kezde sabaq ótkizip jatqan ustaz birden balany mekteptegi dárigerge apardy. Sodan keıin bala Óskemen qalasyndaǵy «Ana men bala ortalyǵyna» jetkizilgen. Keıinnen Almaty qalasynda arnaıy em aldy. Bilim basqarmasy, aýdandyq bilim berý bólimi tarapynan zardap shekken balaǵa materıaldyq kómek kórsetildi. Sondaı-aq Densaýlyq saqtaý basqarmasymen birlese Erkeǵalı Nurlan oftolmologııa ortalyǵynda tegin qaralyp, em alý úshin tez arada Almaty qalasyndaǵy Qazaq ǵylymı-zertteý ınstıtýtyna kvota bólindi», - dep túsindirdi Bilim basqarmasynyń tulǵanyń rýhanı adamgershilik damýy, tárbıe jumysy jáne qosymsha bilim berý boıynsha bólim basshysy Ásem Núskenova.
ShQO Bilim salasyndaǵy sapany baqylaý departamenti atalmysh jaǵdaıǵa oraı tekserý júrgizip, mektep basshylyǵy men sabaq ótkizip jatqan ustazǵa qatysty sheshim shyǵardy. Atalmysh tulǵalarǵa sógis jarııalanyp, aıyppul salyndy. Prokýratýra tarapynan da tekseris júrgizilgen. Erkeǵalıǵa zaqym keltirgen synyptasy kámelet jasyna tolmaýyna baılanysty oǵan qatysty eshqandaı jaza qoldanylmady.
Zardap shekken balanyń ákesi Serik Ákimbaevpen habarlasyp, Erkeǵalıdiń qazirgi jaǵdaıyn surap bildik.
«Byltyr oıynnan ot shyǵyp osyndaı jaǵdaı boldy. Balamdy Almatyǵa deıin aparyp ota jasatyp keldik. Onyń kózine zaqym keltirgen synyptasynyń otbasy 300 myń teńgedeı aqsha berdi. Aýdandy damytý qorynan 400 myń teńge aqsha berildi. Bastaýysh synyp muǵalimi bolsa óz atynan 300 myń teńge kómek kórsetti. Aýdandaǵy ustazdar men mektep dırektorlary shette qalmaı balanyń emine aqsha jınasty. Sonyń arqasynda balamyzdy der kezinde emdetip keldik. Qazir emdi jalǵastyryp kórshiles Reseı eliniń Novosibir qalasyna aparý úshin qarjy jınap jatyrmyz»,- deıdi Serik Ákimbaev.
Áleýmettik jelilerde qyzý talqyǵa túsip jatqan Erkeǵalıdiń jaǵdaıyna beı-jaı qaramaǵan janashyr jandar bir táýliktiń ishinde 1 mıllıonnan astam qarajat jınap bergen. Aýdandyq bilim berý bóliminiń qyzmetkerleri de óz erikterimen oqýshynyń emine taǵy 700 myń teńge qarajat aýdarýǵa nıetti.