ShQO-da sybaılas jemqorlyq jaıly habar bergen adam 4 mln teńge syıaqy aldy

ÓSKEMEN. QazAqparat – Shyǵys Qazaqstan oblysynda sybaılas jemqorlyq týraly habarlaǵan adamǵa 4 mln teńge syıaqy berildi, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttigi Shyǵys Qazaqstan oblysy boıynsha departamentiniń málimetine súıensek, óńirde jemqorlyq faktisi jaıly habarlaǵan azamattarǵa syıaqy berilip jatyr.

«Qazirgi ýaqytta paranyń nemese memleketke keltirilgen zalaldyń mólsheri 1000 AEK-ten aspaıtyn sybaılas jemqorlyq týraly habar bergen adamǵa 100 AEK-ke deıin syıaqy belgilenedi. Al para kólemi 1000 AEK-ten assa, oǵan sol somanyń 10 paıyzy (biraq 4000 AEK-ten aspaıdy) beriledi. Jyl basynan beri oblysta osyndaı faktiler jaıly habarlaǵan 6 adam syıaqy alǵan», - delingen aqparatta.

Aıta keteıik, syıaqynyń eń joǵary mólsheri 4 mln teńgeni qurasa, eń tómengisi – 138 900 teńge.