ShQO-da sýǵa shomylý maýsymynyń aldynda jaǵajaılarǵa tekserý júrgizilip jatyr
ShQO Sanıtarııalyq-epıdemıologııalyq baqylaý departamenti baspasóz qyzmetiniń málimetine súıensek, óńirde sýǵa shomylý maýsymy taıap qalǵandyqtan halyq kóp demalatyn jaǵajaılarda tekserý júrgizilip jatyr.
«Sanıtarlyq-epıdemıologııalyq monıtorıng aıasynda rekreatsııalyq aımaqtardaǵy sý qoımalary men topyraqtan alynǵan sý synamalaryna zerthanalyq zertteýler júrgizilýde. Jospar boıynsha Óskemen qalasyndaǵy eki demalys orny qamtylady. Atap aıtqanda, Karbyshev kóshesiniń boıyndaǵy «Samal» saıabaǵynyń jaǵajaıy jáne Menovnoe aýylynyń janyndaǵy «Kógildir kól» jaǵajaıy. Tekserýler 1 maýsym kúni tolyqtaı aıaqtalady dep kózdelýde», - deıdi departament basshysynyń orynbasary Ǵalymbek Alın.
Sonyń aıasynda shomylýǵa arnalǵan sý qoımalaryndaǵy sýdyń qaýipsizdigi anyqtalmaq. Eger qandaı da kemshilikter baıqalsa, tıisti sharalar qabyldanady.
Osyǵan deıin ShQO-da bıyl shomylýǵa bolatyn 14 ýchaske belgilengeni jaıly habarlaǵan edik.