ShQO-da sot sheshimimen jabylǵan shoshqa fermasy jumysyn toqtatpaı tur

ÓSKEMEN. QazAqparat – Shyǵys Qazaqstan oblysynda sot sheshimimen jabylǵan shoshqa fermasy jumysyn toqtatpaı tur, dep habarlaıdy QazAqparat tilshisi.

ShQO ekologııa departamenti baspasóz qyzmetiniń málimetine súıensek, Óskemen qalasy men Glýbokoe aýdany Stepnoe, Shmelev Log aýyldary halqynyń narazylyǵyn týǵyzǵan shoshqa fermasy byltyr kúzde sot úkimimen jabylǵan bolatyn. Sebebi onda birqatar zańbuzýshylyq anyqtalyp, ferma ıesi berilgen ýaqytta kemshilikti túzetpegen edi.

«Sot úkimi kúshine engen soń departament mamandary shoshqa fermasyna bardy. Sol kezde bizge jumystyń toqtatylǵany kórsetilgen. Alaıda sońǵy kúnderi turǵyndar tarapynan ferma jumysynyń qaıta jandanyp jatqany jaıly shaǵym tústi», - delingen aqparatta.

Shaǵymnan soń ekologtar shoshqa fermasyna bardy. Nátıjesinde, turǵyndar narazylyǵynyń oryndy ekendigi anyqtalǵan.

«Ferma ıesi taǵy da shoshqa ustap otyr. Endi oblystyq ádilet departamenti arqyly onyń jumysyn toqtatý týraly atqarýshylyq is qozǵaý kózdelýde», - delingen aqparatta.

Eske salsaq, ShQO-da turǵyndar narazylyǵyn týǵyzǵan shoshqa fermasyna qatysty sot úkimi shyqqany habarlanǵan.