ShQO-da sot protsesin onlaın rejimde ótkizý engizildi

ASTANA. QazAqparat - Shyǵys Qazaqstan oblysynyń túzeý mekemelerindegi jazasyn óteýshiler budan bylaı sot májilisterine qashyqtyqtan onlaın rejimde qatystyra alady, dep habarlaıdy «QazAqparat» HAA tilshisi.

Bul týraly ShQO prokýroratýrasynyń baspasóz qyzmeti habarlaıdy.

Oblystyq prokýratýra Óskemen qalasynyń №2 sotymen birlese otyryp, jylyna 14 mıllıon teńge ketetin shyǵyndy únemdep, sot protsesine qatysty jańa jumys tártibin iske qospaq. Buryn jazasyn óteýshilerdi sot májilisine qatystyrý úshin túzeý mekemesinen sot ǵımaratyna joldaý qajettigi týyndaıtyn. Tasymaldaý, kúzetý, tamaqtandyrýdy eseptegende buǵan birshama qarajat ketetini belgili. Tipti qarajat shyǵyny sottalǵandardy oblys ortalyǵyndaǵy túzeý mekemelerine aparý kezinde de jumsalatyn. 

«Sottalǵandar qylmystyq-atqarý zańnamasyna sáıkes jaza óteý barysynda merziminen buryn shartty túrde bosatý, ótelmegen jaza bóligin neǵurlym jeńil jaza túrimen aýystyrý jáne taǵy basqa mazmundaǵy qoldaýhattardy sotqa joldaýǵa quqyly. Osy isterdiń qaralýyn barynsha jeńildetý maqsatynda aǵymdaǵy jyldyń 1 tamyzynan bastap Óskemen qalasynyń №2 soty mundaı ótinishterdi beınekonferentsııa baılanysy arqyly qaraýda. Tek bir aptanyń ishinde osyndaı tásilmen 35 sot májilisi ótkizildi. Sottalǵandar men olardyń qorǵaýshylary, túzeý mekemesiniń ókilderi sot protsesine beınekórilim arqyly qatysady», - dep habarlaıdy qadaǵalaý organy.

Oblystyq prokýratýra jańadan engizilgen jumys tártibi keleshekte sot protsesin jeńildetip qana qoımaı, memlekettik bıýdjettiń qarajatyn edáýir únemdeıtinine senimdi. Mundaı tájirıbe keleshekte Jarma, Shemonaıha aýdandarynda jáne Semeı qalasynda da qolǵa alynbaq.