ShQO-da sońǵy úsh jylda sábı ólimi 28 paıyzǵa azaıǵan
Bul jaıly búgin aımaq basshysy Danıal Ahmetov qoǵamdyq keńes aldyndaǵy esep berýinde aıtty.
«Oblystyń medıtsına salysyn respýblıka boıynsha aldyńǵy qatarǵa shyǵarý úshin 3 jylda 22,3 mlrd teńge jumyldyrylyp, 1086 zamanýı jabdyq satyp alyndy. Robotohırýrgııa, polıtravma, ortopedııa, oftalmohırýrgııa, gıbrıdti ota jasaý ortalyqtary ashyldy. Nátıjesinde búginde sábı ólimi 28%-ǵa, qan aınalymy júıesiniń aýrýlarynan kóz jumǵandar – 7%-ǵa, týberkýlezden qaıtys bolǵandar – 66%-ǵa azaıǵan», – deıdi ol.
Osy ýaqyt aralyǵynda óńirde 276 dáriger shetelderde 3 aı kóleminde biliktilik arttyrdy. Aldaǵy ýaqytta da aq halattylar medıtsınasy damyǵan Anglııa, Polsha, Izraıl, Koreıa syndy memleketterge baryp bilim almaq. Alaıda oqý merzimi 3 aıdan 1 jylǵa deıin uzartylady.
«Halyqqa sapaly medıtsınalyq kómek kórsetý úshin birinshi kezekte dárigerlerdiń biliktiligin arttyrý kerek. Eýropada medıtsına salasynyń stýdentteri 15 jyl bilim alsa, bizde oqý merzimi budan eki ese qysqa. Sol úshin dárigerlerdi shetelderge jiberýdiń mańyzy zor», – deıdi Danıal Kenjetaıuly.