ShQO-da sońǵy úsh jylda para berýge ıtermelegen 21 adam sottaldy

ÓSKEMEN. QazAqparat – Shyǵys Qazaqstan oblysynda sońǵy 3 jylda para berýge ıtermeleýge qatysty 39 qylmys tirkeldi, dep habarlaıdy QazAqparat tilshisi.

Sybaılas jemqorlyqqa qarsy is-qımyl agenttigi ShQO boıynsha departamentiniń málimetine súıensek, óńir boıynsha sońǵy úsh jylda alaıaqtyq faktisi boıynsha 71 qylmystyq is qaralǵan.

Onyń ishinde 39-y para berýge ıtermeleý bolyp otyr. Barlyǵy 21 adam sottaldy.

Jábirlenýshilerge kelgen materıaldyq zalaldyń jalpy somasy - 477,6 mln teńge.

Máselen, Shyǵys Qazaqstan oblysynda er adam kásipkerdi áńgimege tartyp, quqyq qorǵaý organdarymen týyndaǵan máseleni sheship bere alatynyn jetkizgen.

Biraq bul «kómegi» úshin 43 mln teńge surady. Alaıda aqshany alǵannan keıin alaıaq habar-osharsyz ketti.

Osylaısha, óz máselesin sheshý úshin para bermek bolǵan kásipker aldanyp qalyp, shyǵynǵa batqan.

«Sybaılas jemqorlyq táýekelderin joıý úshin búginde halyq pen bızneske kórsetiletin memlekettik qyzmetterdiń 94 paıyzy tsıfrlandyrylǵan. Telefon arqyly 940 qyzmetti alýǵa bolady, 19 qujat túri tsıfrlyq formatta usynylǵan, 25 qyzmet onlaın rejımde qoljetimdi. Sondyqtan azamattarǵa laýazymdy tulǵalarǵa aqsha berýge qatysty usynystarǵa múlde kelispeýge, sondaı zańsyzdyqtardy baıqaǵan jaǵdaıda dereý 1424 telefonyna habarlasýdy suraımyz», - deıdi departament basshysy Denıs Shakenov.