ShQO-da soǵys ardagerlerine 600 myń teńgeden berildi

ÓSKEMEN. QazAqparat – Shyǵys Qazaqstan oblysynda Jeńis kúni qarsańynda soǵys ardagerlerine materıaldyq kómek kórsetildi, dep habarlaıdy QazAqparat tilshisi.

Búgingi tańda óńirde 124 soǵys ardageri, 15 myńnan astam tyl eńbekkeri bar. Jyl saıyn Jeńis kúninde olarǵa materıaldyq kómek kórsetilip keledi. Alaıda bıyl koronavırýs ınfektsııasynyń taralýyna baılanysty bul qarajat erterek berilgen.

Oblystyq Ardagerler keńesiniń tóraǵasy Aıtqazy Sherýbaevtyń aıtýynsha, osy jyly soǵys ardagerlerine - 600 myń teńgeden, al tyl eńbekkerlerine - 100 myń teńgeden tabys etildi.

«7-9 mamyr aralyǵynda aımaq boıynsha Jeńistiń 75 jyldyǵyna oraı 340-tan astam shara ótkizý josparlanǵan bolatyn. Ókinishke qaraı, elimizde Tótenshe jaǵdaı jarııalanǵandyqtan keıbir sharalar keıinge shegerilip, birazy ótkizilmeıtin boldy. Biraq bul ardagerlerimiz esh nazarsyz, qoldaýsyz qalady degen sóz emes. Kún saıyn eriktiler, belsendiler, úkimettik emes uıymdar bizge habarlasyp ardagerler men jalǵyzbasty zeınetkerlerge kómek kórsetkisi keletinin aıtýda. Óńirdiń barlyq qalalary men aýdandaryndaǵy jany jaısań jandar birigip, qazynaly qarttardy qamqorlyqqa alyp jatyr», - deıdi Aıtqazy Sherýbaev.