ShQO-da «Shyǵys-adaldyq alańy» jobasyn iske asyrý barysy talqylandy
Sharaǵa ShQO sybaılas jemqorlyqqa qarsy qyzmetiniń basshysy Erlan Jalmaǵambet, «Shyǵys-adaldyq alańy» jobalyq keńsesiniń basshysy Marjan Baqyt, qalalar men aýdandardyń ákimderi, oblystyq basqarmalardyń basshylary qatysty.
– Qazaqstan Respýblıkasy Sybaılas jemqorlyqqa qarsy is-qımyl agenttigi oblys ákimdigi tarapynan atqarylǵan jumystyń keń aýqymyn erekshe atap ótti. Shyǵys Qazaqstan memleket basshysynyń joldaýy aıasynda «Halyq únine qulaq asatyn memleket» tujyrymdamasynda belgilengen memlekettik organdardy transformatsııalaý jáne halyqqa qyzmet kórsetýdiń servıstik modeline kóshý jumysyn alǵashqylardyń biri bolyp júzege asyrdy, – dedi Erlan Jalmaǵambet.
«Shyǵys – adaldyq alańy» jobasy aıasynda óńirdegi barlyq qala jáne aýdan ákimdikteri tolyq «Ashyq ákimdik» formatyna kóshti. Bul model oblystyń taǵy 11 iri aýyldyq okrýgterinde júzege asýda. Jumystyń jańa formaty turǵyndarǵa «bir tereze» qaǵıdaty boıynsha memlekettik organdardan qyzmetterdi jáne túsindirme jumystaryn jedel jáne kedergisiz alýǵa múmkindik beredi.
Aımaq basshysy Danıal Ahmetov memlekettik qarajattyń jumsalýyna qoǵamdyq baqylaýdyń kúsheıgenin atap ótti. Máselen, «Ashyq bıýdjetter» portalynda bıýdjettik baǵdarlamalardyń jobalary bekitilgenge deıin kópshiliktiń talqylaýyna jarııalanady. Sol arqyly turǵyndar bıýdjet qarajatyn jumsaý protsesine ózgerister engizýge múmkindik alady.
– Jergilikti atqarýshy organdardyń ınternet-resýrstarynda azamattyq bıýdjet barshaǵa qoljetimdi formada jarııalanýda. Aýdandar men aýyldyq okrýgterde jergilikti turǵyndardyń qatysýymen bıýdjet qarajatyn tıimdi jumsaý jumystary «Halyq qatysatyn bıýdjet» jobasy aıasynda sátti júzege asyrylyp keledi. Bul baǵyttaǵy jumys qazirgi tańda Óskemen, Semeı jáne Kýrchatov qalalarynda da qolǵa alynyp jatyr, - dedi Danıal Ahmetov.
Sonymen qatar, oblystyń sybaılas jemqorlyqqa qarsy kúres basqarmasynyń basshysy atap ótkendeı, ShQO boıynsha «Ashyq bıýdjetterdiń ınteraktıvti kartasy» platformasynda 1 trln teńgege 4762 bıýdjet jarııalanǵan. Bul Qazaqstan boıynsha eń úzdik kórsetkish bolyp tabylady. Danıal Ahmetov «Shyǵys - adaldyq alańy» jobalyq ofısine osy portalda derekterdiń durys jáne ýaqtyly ornalastyrylýyn qatań qadaǵalaýdy tapsyrdy.
Keńes barysynda sybaılas jemqorlyqqa qarsy qyzmetti retteıtin jańa zań da talqylandy. Atap ótý kerek, budan bylaı memlekettik qyzmetkerlerge, depýtattar men sýdıalarǵa shetel bankterinde shottar ashýǵa jáne qarajat saqtaýǵa tyıym salynǵan. Sondaı-aq, aýyr jáne asa aýyr sybaılas jemqorlyq qylmystary úshin sottalǵan azamattar merziminen buryn shartty túrde bosatylmaıdy.