ShQO-da shoshqa fermasyn jabýǵa qatysty sot sheshimi ózgerissiz qaldy
Óskemen qalasy men Glýbokoe aýdany Stepnoe, Shmelev Log aýyldary halqynyń narazylyǵyn týǵyzǵan shoshqa fermasyna qatysty tekserý byltyr júrgizilgen bolatyn. Turǵyndar shoshqa fermasy men mal soıý alańynan shyqqan qaldyqtardyń adam densaýlyǵyna jáne tabıǵı ortaǵa keltiretin zııany týraly aıtqan. ShQO Ekologııa departamenti tekserý barysynda talaı zańbuzýshylyqty anyqtady.
Belgili bolǵandaı, «Rodnıchok» sharýa qojalyǵyna tıesili shoshqa fermasy jumys isteýge qajetti ekologııalyq ruqsat qaǵazdaryn rásimdemegen. Shoshqa qaldyqtary ashyq jerge tastalyp, saldarynan topyraq jamylǵysy lastandy. Soǵan oraı quzyrly departament ferma ıesine aıyppul salyp, kemshilikterdi túzetýge ýaqyt berdi. Alaıda odan esh nátıje shyqqan joq. Osydan soń is ShQO mamandandyrylǵan aýdanaralyq ekonomıkalyq sotynda qaraldy. Sot shoshqa fermasyn jabý týraly sheshim shyǵarǵan.
Alaıda ferma ıesi úkimmen kelispeı, apellıatsııalyq sotqa júgindi. Shyǵys Qazaqstan oblystyq sotynyń azamattyq ister jónindegi sot alqasynyń 8 aqpan kúni jarııalanǵan úkimimen bul sheshim ózgerissiz qalyp otyr.
«Ekologııa departamenti byltyr tekserý qorytyndysy boıynsha sharýa qojalyǵyna jalpy somasy 1 072 048 myń teńge aıyppul salyp, zańbuzýshylyqtardy joıýǵa ýaqyt bergen. Biraq jeke kásipker uıǵarymdy oryndaýdan bas tartty. Sodan keıin departament «Rodnıchok» sharýa qojalyǵynyń qyzmetin toqtatý týraly sotqa talap aryz joldady. Ekonomıkalyq sot bul talapty tolyqtaı qanaǵattandyrdy. Apellıatsııalyq sot qorshaǵan ortaǵa keltirilgen orny tolmas zııandy jáne jergilikti turǵyndardyń pikirin eskere otyryp bul sheshimdi ózgerissiz qaldyrdy», - dep habarlady ShQO Ekologııa departamentiniń baspasóz qyzmetinen.
Foto:pig-consultants.com