ShQO-da shomylýǵa bolatyn jaǵajaılar sany artty
ShQO tótenshe jaǵdaılar departamenti baspasóz qyzmetiniń málimetine súıensek, shomylý maýsymy qarsańynda óńir qutqarýshylary sý aıdyndarynyń jaǵajaılaryn tekserip shyqty.
Tekserý barysynda sýdaǵy júzýge ruqsat etilgen aımaq shekarasynyń belgilenýi, sýdyń maksımaldy tereńdigin kórsetetin belgilerdiń ornatylýyna mán berildi.
Sonymen qatar sýǵa batqan adamǵa kómek kórsetýge qajetti zattar bar arnaıy medıtsınalyq jáne qutqarý beketteriniń bar-joǵy tekserildi.
«Demalys oryndarynyń ıeleri «Sý aıdyndarynda qaýipsizdikti uıymdastyrý» erejelerin qatań saqtaýy kerek. Balalarǵa shomylýǵa arnaıy bólingen ýchaskeler bolýy tıis. Tekserý qorytyndysy boıynsha oblys aýmaǵynda 5 kommýnaldyq jaǵajaıda shomylýǵa ruqsat etildi. Onyń ekeýi Altaı aýdanynda, ekeýi Óskemende, bireýi Ulan aýdanynda. Osy jaǵajaılarda tıisti daıyndyq jumystary júrgizilgen. ıAǵnı, aýmaǵy tazartylyp, sý aıdyndarynyń túbi tekserilip, kezekshilik atqaratyn erikti qutqarýshylar oqytyldy. Medpersonalǵa arnalǵan beketter de jasaqtalǵan. Budan bólek, Katonqaraǵaı aýdanynda jáne Rıdder qalasynda da jaǵajaılar ashylady dep josparlanýda», - deıdi oblystyq TJD bastyǵynyń orynbasary Arman Toqanov.
ShQO ákimdiginiń jańa qaýlysy boıynsha óńirde shomylýǵa arnalǵan 21 ýchaske belgilengen.
Buǵan deıin 14 ýchaske edi. Al 74 ýchaskede sýǵa túsýge tyıym salynǵan.