ShQO-da shekaralyq aýdandardy damytý baǵdarlamasy qalaı iske asyp jatyr

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov shekara mańyndaǵy eldi mekenderdi damytý baǵdarlamasyna kiretin Tarbaǵataı aýdany ákiminiń esebin tyńdady, dep habarlaıdy QazAqparat tilshisi.

Búginde Shyǵys Qazaqstan osyndaı baǵdarlama qabyldaǵan elimizdegi jalǵyz oblys. Oǵan óńirdegi burynǵy aýdan ortalyqtary da enip otyr.

«Baǵdarlamanyń iske asyrylýyna jaýapty barlyq basqarma basshylaryna eskertý jasadym. Óıtkeni, olardyń mamandary aýyldardy jıi aralamaıdy. Máselen, Tarbaǵataı aýdanynda aýyl sharýashylyǵy tehnıkasyn jetkizý, bordaqylaý alańdarynyń jumysy jáne elıtalyq mal basyn kóbeıtý máselelerin sheshý qajet. Aýyl sharýashylyǵy basqarmasy agroónerkásip kesheni baǵdarlamalarynyń oryndalý barysyn qadaǵalaýy shart», - dedi Danıal Ahmetov.

Onyń aıtýynsha, shekaralyq aýdandardy damytýǵa selqos qaraýǵa bolmaıdy. Oblys ákimi atalǵan basqarma basshysyna 10 kún ishinde Kúrshim, Tarbaǵataı, Katonqaraǵaı jáne basqa da aýdandarda jobalardyń iske asyrylýy týraly esep daıyndaýdy tapsyrdy.

Tarbaǵataı aýdanynyń ákimi Ashat Smaılovtyń málimetinshe, Aqsýat aýylynda bıyl sý qubyrynyń qurylysy aıaqtalyp, Aqjar aýylynda fýtbol alańy salynady. Sondaı-aq úsh aýylda energııa únemdeıtin shamdar ornatylyp, joldarǵa ortasha jóndeý jumystary júrgizilmek.