ShQO-da shekara shebindegi aýyldardy spýtnıktik ınternetke qosýda qıyndyqtar týyndady
Oblys aýyldaryn «Starlink» spýtnıktik ınternet júıesine qosý jumystary «Qoljetimdi ınternet» ulttyq jobasy aıasynda júrgizilýde. Birinshi kezekte ınterneti múlde joq nemese jyldamdyǵy tómen eldi mekender tańdalyp alynǵan. Qazirgi ýaqytta Altaı jáne Glýbokoe aýdandaryndaǵy birneshe aýyl mektepteri osy ınternetke qosyldy.
Alaıda Reseı Federatsııasy men Qytaı shekarasyna jaqyn ornalasqan aýyldardy spýtnıktik ınternetke qosýda qıyndyqtar týyndady. Bul týraly ShQO Tsıfrlandyrý jáne arhıvter basqarmasynyń ókili Arnur Saparǵalıev málim etti.
«Shekara shebindegi 28 aýyldy ınternetke qosý múmkin bolmaı tur. Reseı men Qytaı «Starlink-tiń» qamtý kartasyna kirmeıdi. Sonyń saldarynan Shyǵys Qazaqstan oblysynyń atalǵan elderdiń shekarasyna jaqyn ornalasqan eldi mekenderinde spýtnıktik ınternet qosý jumystaryna kedergi keldirýde», - deıdi ol.
Eske salsaq, bıyl sáýir aıynda Shyǵys Qazaqstanda alǵash ret aýyl mektebi spýtnıktik ınternetke qosylǵany habarlanǵan.