ShQO-da «Serpin» túlekterine mıllıon teńgege deıin sýbsıdııa tólenedi
Shyǵys Qazaqstanda bıyl úshinshi jyl qatarynan «Serpin» túlekteri úlken ómirge qadam basyp otyr. Olardyń 382-si D.Serikbaev atyndaǵy Shyǵys Qazaqstan memlekettik ýnıversıtetin támamdamaq. Atalmysh bilim ordasynda ótken kezdesý barysynda jergilikti ákimdik ókilderi men kásiporyn basshylary «serpindikterge» bos jumys oryndary men jas mamandarǵa jasalatyn jaǵdaı týraly tolyqqandy aqparat berdi.
«Serpin» túlekterine ásirese óndiristik aýdandarda suranys joǵary.
«Shyǵys Qazaqstan aımaqtyq energetıka kompanııasy» «Serpin» túlekterine Glýbokoe, Shemonaıha aýdandary men Rıdder qalasynan 27 jumys ornyn usynyp otyr. Sonyń ishinde Shemonaıha aýdanynyń ákimdigi jalǵyz ózi kóship kelgen túlekke bir bólmeli páter, otbasymen qonys aýdarǵan túlekterge 2 nemese 3 bólmeli páter bermek.
«Kelisimshart merzimi bitken soń atalmysh páterlerdi satyp alý múmkindigi de beriledi», - deıdi kompanııanyń Altaı aımaǵy boıynsha fılıalynyń dırektory Erbolat Alpıev.
Al Glýbokoe aýdany jumysqa kelgen «serpindik» jastardyń páter jaldaý jáne kommýnaldyq tólemder aqysyn ótep berýge daıyn.
Oblystyq jumyspen qamtý jáne áleýmettik baǵdarlamalardy retteý basqarmasynyń basshysy Erbolat Oshaqbaevtyń aıtýynsha, dál osyndaı kóterme kómek oblystyń ózge aýdandarynda da qarastyrylǵan.
«Óskemen, Semeı, Rıdder, Aıagóz, Zaısan, Serebrıansk, Shemonaıha, Kýrchatov qalalarynda qalyp, jumys istegisi keletin túlekterge bir jylda 606 myń teńge tóleımiz. Al eger jas maman ózimen birge otbasyn kóshirip ákelse, ár adam úshin 757 myń teńgeden 909 myń teńgege deıin sýbsıdııa tólenedi. Al aýdan ortalyqtary men aýyldarǵa qonys aýdarsańyzdar, kisi basyna 545 myńnan 636 myń teńgege deıin sýbsıdııa beriledi», - dedi Erbolat Oshaqbaev.