ShQO-da saıası qýǵyn-súrgin qurbandaryna qatysty jańa qujattar tabyldy
ShQO ákimi Danıal Ahmetov saıası qýǵyn-súrgin qurbandaryn aqtaý jónindegi komıssııanyń esebin tyńdady.
«Tarıhshylar, ǵalymdar men joǵary oqý oryndarynyń oqytýshylary úlken ári mańyzdy jumys atqardy. Muraǵattardan aqtalmaǵan 2847 adamnyń isi tabylǵan. Olardyń 2666-sy ońaltý sharalarymen qamtylýy tıis. Búginde komıssııa barlyq qajetti qujattardy daıyndap qoıdy. Óz týystarynyń taǵdyry týraly bilgisi keletin azamattardyń ótinishterinen keıin biz arnaıy portal ashtyq. Onda qaldyrylǵan ár ótinishti mamandar mindetti túrde qarastyrady. Qazirdiń ózinde 494 is memlekettik komıssııanyń qaraýyna jiberilmek», - dedi aımaq basshysy.
Sondaı-aq komıssııa kúshtep jer aýdarylǵan 203 adamnyń isin tolyq zerdeledi. Onyń ústine alǵash ret olardyń naqty sany anyqtalmaq.
«Budan bólek, mamandar Uly Otan soǵysy kezinde kontslagerlerde bolǵan shyǵysqazaqstandyq tutqyndardyń isterimen jumys isteýde. Osy jumysqa stýdentterdi, magıstranttardy, volonterlerdi tartý qajet. Biz óz tarapymyzdan olardy qajetti jabdyqpen qamtamasyz etýge daıynbyz. Tarıh eshqashanda umytylmaýy jáne burmalanbaýy kerek! Bul saıası kezeń tolyqqandy zerttelýi tıis», - dedi Danıal Ahmetov.