ShQO-da saıası qýǵyn-súrgin qurbandaryn aqtaý boıynsha 26 muraǵat qory zerttelýde
QR Prezıdenti Qasym-Jomart Toqaevtyń arnaýly Jarlyǵymen Saıası qýǵyn-súrgin qurbandaryn tolyqtaı aqtaý jónindegi memlekettik komıssııa qurylǵan bolatyn. Onyń júıeli jumysyn uıymdastyrý úshin elimizdiń barlyq aımaqtarynda óńirlik komıssııalar óz jumysyn bastaǵan edi. Shyǵys Qazaqstan oblysynda osy maqsatta qandaı jumys atqarylyp jatqandyǵyn oblystyq Aqparat ortalyǵynda ótken baspasóz brıfıng barysynda ShQO ákiminiń orynbasary Azamat Mýhamedchınov aıtyp berdi.
«Memleket basshysynyń tapsyrmasymen saıası qýǵyn-súrgin qurbandaryn aqtaý boıynsha keshendi sharalar atqarylýda. Komıssııa músheleri 10 baǵyt boıynsha jumys istep jatyr. Oblystyń memlekettik muraǵatynyń jáne arnaıy muraǵattardyń 26 qoryna zertteý júrgizilýde», - dedi ol.
Saıası qýǵyn-súrginniń aqtalmaǵan qurbandaryn izdeýdiń elektrondy bazasy ázirlenip, toltyrylýda. Bul qýǵyn-súrginge ushyraǵan azamattar týraly málimetterdi bir arnaǵa jınaýǵa múmkindik beredi.
«Portaldyń ishki bóligine myńnan astam adamǵa arnalǵan saýalnamalar engizildi. Sondaı-aq 33 qordaǵy jabyq málimetter jarııalandy. Qazirgi ýaqytta ǵalymdar men muraǵatshylar osy baǵyttaǵy jumystardy jalǵastyrýda», - dedi Azamat Mýhamedchınov.