ShQO-da saq qorymdarynan tabylǵan jádigerler Ulybrıtanııa mýzeıinde kórsetiledi

ÓSKEMEN. QazAqparat – Shyǵys Qazaqstan oblysyndaǵy ejelgi saq qorymdarynan tabylǵan 300 altyn artefakt qyrkúıek aıynda alǵash ret Ulybrıtanııanyń Kembrıd qalasynda ornalasqan Fıtsýılıam mýzeıine qoıylady, dep habarlaıdy QazAqparat tilshisi.

ShQO ákimi baspasóz qyzmetiniń málimetine súıensek, bul týraly 10 tamyzda Bı-Bı-Sı jáne basqa da jetekshi brıtandyq saıttar jazǵan.

«Shamamen 2700 jyl buryn jerlengen ejelgi jaýyngerlerge tıesili altyn artefaktiler alǵash ret Ulybrıtanııada kórsetiledi. Shyǵys Qazaqstan oblysyndaǵy Saq qorymdarynan alynǵan qazynalar Kembrıdjdegi Fıtsýılıam mýzeıine qoıylady. Onda zergerlik buıymdar men at ábzelderi jáne basqa da zattar usynylady. Zertteýshiler olardy ınvazıvti emes tehnologııalardy qoldana otyryp zertteıdi», dep habarlady BBC News.

Bedeldi basylymdardyń biri – The Times kópshiliktiń kóńilin aýdaratyn element – jas sadaqshynyń jerlengen qorymy bolatynyn jáne úsh saq qorymynynan tabylǵan qazynalar 28 qyrkúıekten bastap kópshilik nazaryna usynylatynyn habarlaǵan.

Kúndelikti shyǵatyn Daily Mail gazeti kórmede 300-den astam artefakt usynylatynyn jáne olardyń keıbireýleri myńdaǵan usaq bólshekterden turatynyn málim etken. Sondaı-aq «Gardıan» basylymy kórmede budan bólek Qazaqstanda sońǵy jyldary ashylǵan eń keremet arheologııalyq jańalyqtar kórsetiletinin habarlady.

Eske sala keteıik, ShQO ákimi buǵan deıin Eleke Sazy arheologııalyq keshenine baryp, ǵalym Zeınolla Samashevtiń basshylyǵymen júrgizilgen arheologııalyq jumystardyń barysymen tanysqan edi. Sodan keıin oblys zııalylarymen kezdeskende aımaq basshysy Eleke Sazy shatqalyndaǵy qazba jumystary barysynda jáne Aq-Baýyr ǵıbadathanasy kesheninen tabylǵan biregeı oljalar Londondaǵy kórmege qoıylatynyn habarlaǵan bolatyn.