ShQO-da reseılikterge arnalǵan «Ádebı beldeý» týrıstik jobasy júzege asady

ÓSKEMEN. QazAqparat - Shyǵys Qazaqstan men Reseı arasynda «Ádebı beldeý» jobasy júzege aspaq. Bul týraly oblys ákimi Danıal Ahmetov QR-daǵy Reseıdiń Tótenshe jáne ókiletti elshisi Alekseı Borodavkınmen kezdesý kezinde aıtty, dep habarlaıdy QazAqparat tilshisi.

Bul qyzmetke jýyqta taǵaıyndalǵan Alekseı Borodavkındi Danıal Ahmetov óńirdiń áleýmettik-ekonomıkalyq damýymen qysqasha tanystyryp ótti.

«Reseımen baýyrlastyq qarym-qatynasty saqtaý óte mańyzdy. ShQO men RF arasynda dástúrli "Altaı - bizdiń ortaq úıimiz" mádenı-gýmanıtarlyq baǵdarlamasy aıasynda jyldar boıy qalyptasqan tyǵyz qarym-qatynasymyz tek nyǵaıa túsýde. Jobany ary qaraı da qoldaý qajet. Mádenı seriktestikti nyǵaıtý úshin týrısterge arnalǵan «Ádebı beldeý» jobasyn uıymdastyrýdy josparlap otyrmyz», - dedi Danıal Ahmetov.

Óz kezeginde Reseı elshisi saýda-ekonomıkalyq jáne mádenı-gýmanıtarlyq, týrıstik salalardaǵy ekijaqty qarym-qatynasty ary qaraı damytýǵa múddeli ekenin jetkizdi.

«Bul meniń aımaqqa alǵashqy saparym. Biz eki eldiń dıplomatııalyq qarym-qatynasyna asa mán beremiz. Óıtkeni, bul aımaq Qazaqstan ónerkásibiniń flagmany bolyp tabylady. Sondaı-aq, Shyǵys Qazaqstannyń shet eldermen keń aýqymdaǵy bıznes baılanystary jáne álemniń jetekshi memleketterimen metallýrgııa, aýyl sharýashylyǵy, medıtsına jáne basqa da mańyzdy baǵyttary boıynsha saýatty ekonomıkalyq kooperatsııasy bar», - dedi Alekseı Nıkolaevıch.

Aıta keteıik, ótken jyly ShQO men Reseı arasyndaǵy taýar aınalymynyń kólemi 1 mlrd. 258 mln dollardy qurady. Bıyl bul kórsetkishti 1 mlrd. 4 mln. dollarǵa deıin kóbeıtip, eksport pen ımport nomenklatýrasyn arttyrý josparlanýda.