ShQO-da Reseıge balyq eksporttaý josparlanyp otyr

ÓSKEMEN. QazAqparat - QR Ekologııa, geologııa jáne tabıǵı resýrstar mınıstri Maǵzum Myrzaǵalıev Shyǵys Qazaqstan oblysyna jumys sapary barysynda «GrandFish» JShS-na bardy, dep habarlaıdy QazAqparat tilshisi.

2017 jyly qurylǵan kásiporyn alabalyq ósirýmen aınalysýda. 2021 jyldan bastap JShS bazasynda ınkýbatsııalyq tseh iske qosylmaq.

«Qazir kásiporynda 20 adam jumys isteıdi. Keler jyly kóktemde tseh ashylýyna baılanysty 30 jumys orny qurylady. Joba qýattylyǵy – jylyna 1200 tonna taýarly balyq óndirýge jetedi. Bul kórsetkishke 2030 jylǵa qaraı jetemiz dep otyrmyz. Alabalyqtan basqa da balyq túrlerin ósirý josparda bar», - dedi «GrandFish» JShS basshysy Aleksandr Sobolevskıı.

2019 jyly kásiporyn ishki naryqqa 34 tonna alabalyq satqan. Sondaı-aq Reseıge eksporttaý da kózdelip otyr.

Mınıstr Maǵzum Myrzaǵalıev pen oblys ákimi Danıal Ahmetov sharýashylyq bazasynda balyq jem zaýytyn salýǵa qoldaý kórsetýge kelisti.

Esterińizge sala ketsek, Memleket basshysy Qasym-Jomart Toqaev halyqqa joldaýynda balyq sharýashylyǵyna erekshe mán berý kerektigin aıtqan. 2019 jyly elimizdiń balyq jáne balyq ónimderi naryǵynyń jalpy kólemi 66 myń tonnany qurady. Qazaqstandaǵy sý resýrstary 600 myń tonnaǵa deıin balyq ósirip, eksportty 10 esege arttyrýǵa múmkindik beredi.

Sol sebepti qazir Ekologııa, geologııa jáne tabıǵı resýrstar mınıstrligi balyq sharýashylyǵyn qoldaý maqsatynda Zańǵa birqatar ózgeris engizip, sýbsıdııa berý joldaryn qarastyryp jatyr.