ShQO-da poıyz ótetin taý betkeıinde jasandy qar kóshkini júrgiziledi

ÓSKEMEN. QazAqparat – Temirjolshylar qar kóshkinine qarsy saqtyq úshin «Turǵysyn – Zavodınka» ótpesinde taý betkeıinde jınalǵan qardy jarylys jasap taý etegine túsirmek, dep habarlaıdy QazAqparat «Qazaqstan temir joly» kompanııasynyń baspasóz qyzmetine silteme jasap.

Shyǵys Qazaqstan oblysyndaǵy temir joldyń taýda ótetin tustarynda májbúrli túrde qar kóshkini túsiriledi. Turǵysyn – Zavodınka ótpesinde osyndaı jumys júrgiziledi. Bul shara qar kóshkini paıda bolýy múmkin betkeılerde júzege asyrylady.

«Shyǵys Qazaqstanda qańtar aıy boıy boran soqty. Taýly jerlerdegi joldy qar kóshkini basyp qalýy qaýpine baılanysty birneshe márte aldyn ala eskertý jarııalandy. Soǵan baılanysty kólik joldary jabylǵanymen, temirjol úzdiksiz istep turdy. Qazirgi kezde Serebrıansk jol dıstantsııasynyń jumysshylary taý bókterinen qardyń kóshýin baqylaý júrgizýge daıyndalýda», delingen habarlamada.

«Betkeıge jıylǵan qar kóshkende poıyz qozǵalysyna aıtarlyqtaı qaýip tóndiredi. Bul - tabıǵı qubylys. Sondyqtan biz jarylys jasap Turǵysyn – Zavodınka ótpesinde taýǵa jınalǵan qardy etekke túsiremiz. Ondaǵy qar kólemi jasandy jolmen túsirý úshin jetkilikti», - dep atap kórsetti Serebrıansk jol jol dıstantsııasynyń bastyǵy Farhat Belgibaev.

Jol dıstantsııasynyń mamandary júzege asyratyn monıtorıng málimetteri boıynsha bıylǵy qar kólemi ótken jylǵydan aıtarlyqtaı mol. Qys bastalǵaly kóshkin oryn alýy múmkin ýchaskelerdegi qardyń qalyndyǵy baqylanýda. Mamandar qar jabyny qabatynyń tyǵyzdyǵyn, bıiktigin, temperatýrasyn jıi ólshep turady.