ShQO-da polıtseıler aýyl shetinde ósip turǵan 3 gektar qarasorany órtep jiberdi

ÓSKEMEN. QazAqparat – Shyǵys Qazaqstan oblysy Shemonaıha aýdanynda polıtsııa qyzmetkerleri aýyl shetinde ósip turǵan 3 gektar qarasorany órtep jiberdi, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, 1 maýsym men 30 qazan aralyǵynda óńir boıynsha «Qarasora» jedel-aldyn alý sharasy ótkizilýde.

«Shara aıasynda Pervomaıskoe jáne Ýst-Talovka kentteri, Ýbınka, Vydrıha, Rasypnoe, Krasnaıa Shemonaıha aýyldarynyń irgesinde ósip turǵan úsh gektar qarasora joıyldy. Bundaǵy maqsat - esirtki saýdasynyń aldyn alý», - dep habarlady vedomstvo ókilderi.

Osy rette, departament mamandary aýylsharýashylyq alqaptarynda jáne uıymdardyń aýmaǵynda ósip turǵan qarasorany joımaǵandar ákimshilik jaýapqa tartylatyndyǵyn eskertti. Jeke tulǵalar úshin aıyppul - 10 AEK, al zańdy tulǵalarǵa - 40 AEK-ti quraıdy.