ShQO-da ózge ult ókilderine qazaq tilin úıretýge erekshe kóńil bólinedi
ShQO ákimdiginde ótken jınalys barysynda Prezıdent Qasym-Jomart Toqaevtyń bıylǵy Joldaýy talqyǵa salyndy.
«Memleket basshysy qazaq tilin nasıhattap, eldiń mádenı-tarıhı murasyn zerdelep jáne tıimdi paıdalaný qajettigin aıtty. Óńirimizde ózge ulttarǵa qazaq tilin úıretýge erekshe kóńil bólinedi. Osy maqsatta Qazaqstan halqy Assambleıasynyń Dostyq úıleri, «Vozrojdenıe» til mektebi, lıngvıstıkalyq kabınetter jan-jaqty jumys júrgizýde», - dedi aımaq basshysy Danıal Ahmetov.
Onyń aıtýynsha, óńirde «Sıtýatsııalyq qazaq tili» jobasy iske asyrylýda. Bul aýyzeki tildi úırenýdiń eń qarapaıym jáne tıimdi tásili bolyp otyr.
«Arheologııalyq zertteýler baǵdarlamasyn júzege asyrýdy jalǵastyramyz. Osynyń arqasynda belgili arheologtar Zeınolla Samashev pen Ábdesh Tóleýbaev sensatsııalyq ashýlar jasaýda. Biregeı artefaktilerimiz ben arheologııalyq oljalarymyzdy halyqaralyq deńgeıge shyǵarýǵa daıynbyz. Osy jyldyń 28 qyrkúıeginen bastap 2022 jyldyń 30 qańtaryna deıin «Uly dala altyny» kórmesi Ulybrıtanııadaǵy Kembrıdj ýnıversıtetine qoıylatyn bolady. Bul Qazaqstannyń tarıhı murasyn ilgeriletýdegi mańyzdy qadam», - dedi Danıal Ahmetov.
Sonymen qatar 3 tomdyq «Shyǵys Qazaqstannyń ejelgi dáýiri» jáne «Qazaqstan tarıhy» monografııalaryn basyp shyǵarýǵa daıyndyq jumystary júrgizilýde.