ShQO-da ózen sútti reńkke boıaldy: Qazmyryshqa tekserý bastaldy

ASTANA. QazAqparat – Sarapshylar Shyǵys Qazaqstan oblysynda jer betine qoıyrtpaq tógilip, Fılıpovka ózenine quıylǵanyn anyqtady. Bul týraly Ekologııa jáne tabıǵı resýrstar mınıstrliginen málim etti, dep habarlaıdy QazAqparat tilshisi.

27 shildede áleýmettik jelide Shyǵys Qazaqstan oblysynda Fılıpovka ózeniniń sútti reńkke boıalyp, lastanǵany týraly beıne jarııalanǵan edi. Osy fakti boıynsha Ekologııa, Balyq ınspektsııasy, Sanıtarııalyq-epıdemıologııalyq baqylaý departamentteri, Rıdder qalasy ákimdigi jáne «Qazmyrysh» JShS ókilderiniń qatysýymen komıssııalyq sapar oryn aldy.

«Ózenniń lastanýy «Qazmyrysh» JShS Rıdder taý-ken baıytý kesheniniń qaldyq qoımasyndaǵy qoıyrtpaq qubyrynyń jarylýy saldarynan paıda boldy. Sonyń saldarynan jerge qoıyrtpaq tógilip, keıinnen ózenge quıylǵan. Ekologııa departamentiniń qyzmetkerleri hımııalyq taldaýǵa sý synamalaryn aldy. Qazirgi tańda synama taldanyp jatyr», dep atap ótedi mınıstrlikten.

Ózenniń odan ári lastanýyn joıý maqsatynda «Qazmyrysh» JShS qoıyrtpaq qubyrlaryn bosatty. Sonymen qatar lastanǵan jer ýchaskesi tehnıkamen jınastyrylyp, qoldanystaǵy qaldyq qoımasyna ornalastyryldy.

Atalǵan fakti boıynsha Ekologııa departamenti tarapynan «Qazmyrysh» JShS-ne qatysty jospardan tys tekserý belgilendi.