ShQO-da órt sóndirý kóligine jol bermegen 10-ǵa jýyq júrgizýshige aıyppul salyndy

ÓSKEMEN. QazAqparat – Shyǵys Qazaqstan oblysynda órt sóndirý kóligine jol bermeıtin júrgizýshilerdi anyqtaý úshin reıd júrgizildi, dep habarlaıdy QazAqparat tilshisi.

ShQO TJD baspasóz qyzmetiniń málimetine súıensek, keıbir azamattar órt sóndirý kólikteriniń qozǵalysyna kedergi keltirip jatady. Mine sonyń saldarynan qutqarýshylar altynǵa bergisiz ýaqytty joǵaltady.

Osyndaı jaǵdaılardyń aldyn alý maqsatynda Óskemen, Semeı, Rıdder jáne Altaı qalalarynda arnaıy reıd ótkizildi. Sharaǵa departament mamandary men polıtsııa qyzmetkerleri qatysty. Bul joly kólik kóp júretin joldar tańdalyp alyndy.

«Reıd nátıjesinde Óskemende – 1, Rıdderde – 4 jáne Altaıda – 2 júrgizýshi ákimshilik jaýapkershilikke tartyldy. Sondaı-aq Semeıde – 3, Altaıda – 5 adamǵa eskertý jasaldy. Osyndaı sharalar aldaǵy ýaqytta da jalǵasyn tabady», - delingen aqparatta.