ShQO-da órt qaýipsizdigi erejelerin buzǵan 31 adam jaýapqa tartyldy
ShQO Tótenshe jaǵdaılar departamenti baspasóz qyzmetiniń málimetine súıensek, óńirde aýa raıynyń kúrt ysyp, jaýyn-jashynnyń az jaýýyna baılanysty órt qaýpi arta túsken.
«Búgingi kúni órt qaýpi joǵary kezeń bastalǵaly oblys boıynsha 6 orman órti tirkeldi. Sondaı-aq 12 dala órti shyǵyp, jalyn sharpyǵan aýmaqtyń jalpy kólemi 39,4 gektar boldy. Osy rette qutqarýshylar, polıtsııa qyzmetkerleri jáne jergilikti atqarýshy organ ókilderi birlesip profılaktıkalyq reıdter júrgizip jatyr», - delingen aqparatta.
Barlyǵy 50 mobıldi top jumys istep jatyr. Ýaqytyly júrgizilgen aldyn alý sharalarynyń arqasynda órt qaýipsizdigi erejelerin buzǵan 31 adam anyqtalyp, ákimshilik jaýapkershilikke tartyldy.
Qazir oblystaǵy Altaı, Marqakól, Katonqaraǵaı, Úlken Naryn aýdandarynda 2-dárejeli órt qaýpi bar. Al Óskemen, Rıdder qalalarynda jáne Kúrshim, Samar aýdandarynda 3-dárejeli órt qaýpi saqtalyp otyr.