ShQO-da óndiriste jaraqat alǵandar sany artty

ÓSKEMEN. QazAqparat – Shyǵys Qazaqstan oblysynda jumys barysynda jaraqat alyp, túrli aýrýǵa shaldyqqandar sany 1 jarym esege artyp otyr, dep habarlaıdy QazAqparat tilshisi.

ShQO Sanıtarlyq-epıdemıologııalyq baqylaý departamenti baspasóz qyzmetiniń málimetine súıensek, óńir boıynsha kásiptik aýrýǵa shaldyǵý faktileri ósken.

«Óndiris oryndaǵy apat, tehnologııalyq protsestiń buzylýy, jumystyń talapqa saı uıymdastyrylmaýy jáne sanıtarlyq-tehnıkalyq quraldardyń durys jumys istemeýi saldarynan eńbek ujymynda zardap shegý jaǵdaılary bolyp jatady. Shyǵys Qazaqstanda byltyr osyndaı 210 jaǵdaı tirkelgen. Kásiptik aýrý deńgeıi onyń aldyndaǵy jylmen salystyrǵanda 1,4 esege ósip otyr», - delingen aqparatta.

Oblystyń 7 aýdanynda kásiptik aýrýlar turaqty túrde tirkeledi. Jyl kóleminde jumys barysynda ýlaný jaǵdaılary bolǵan joq.

«Basshylyqtyń belgilengen talaptardy saqtamaýy saldarynan qyzmetkerler arasynda múgedek bolyp qalatyndar da kezdesedi. Kásiptik aýrýlar basqa negizgi syrqattardan sırek kezdesetinine qaramastan, onyń áleýmettik mańyzy zor. Óıtkeni olar eńbekke qabiletti jastaǵy adamdardyń azaıýyna áser etedi», - delingen málimette.