ShQO-da oqýshylar 90 jyl buryn salynǵan eski mektepterde oqýǵa májbúr
El shyǵysynda 344 memlekettik mektep bar. Eń eskisi 90 jyl buryn salynǵan. Al Shemonaıha qalasy Temirjol shaǵynaýdanyndaǵy mektep osy kúzde óziniń 88 jyldyǵyn atap ótti. Ótken jyldardyń sarqynshaǵy qabyrǵalardan, tóbelerden, baspaldaqtardan baıqalyp tur.
- Bizdi ǵımarattyń syrt kózge qalaı kórinetini tolǵandyrmaıdy. Jasyna qaramastan mektebimiz jaıly. 1936 jyly temirjol beketi jumysshylarynyń balalaryna arnalyp salynǵan. Dese de 88 jyldyń ishinde eskirgeni anyq. Bizde ashana bolǵan joq. Balalardy tamaqpen qamtamasyz etý úshin birneshe kabınetti biriktirdik. Medıtsınalyq kabınetten bastap, jýynatyn bólmelerge deıin kabınetterdi yńǵaılastyryp jasap alǵanbyz, - deıdi mektep dırektory Nazıgúl Totekına.
Onyń aıtýynsha, mektepte 360 bala bilim alady. 2 kishkentaı jýynatyn bólmeniń ishinde ǵana dárethana bar. Akt zaly da joq. Sol sebepti barlyq shara sportzalda ótedi. Ol da talaptarǵa saı emes, joǵarǵy qabatta ornalasqan.
- Bul óte yńǵaısyz. Dene shynyqtyrý sabaǵynda astyndaǵy kabınettiń muǵalimderi shaǵymdanady. Eger balalar júgirse, qabyrǵalar, tóbeler dirildeıdi. Sportpen aınalysqanda qalaı júgirmeýge bolady? Qosymsha jarystarǵa tek keshki ýaqytta daıyndala alamyz, - deıdi 9 synyp oqýshysy Nıkıta Reızvıh.
Eń basty másele – bul tar ǵımaratqa oqýshylar syımaı barady. 200-den astam balaǵa arnalǵan mektepte qazir 360 oqýshy bilim alyp jatyr.
Rıdderdiń de keıbir oqý ǵımarattary syn kótermeıdi. Kenshiler qalasyndaǵy №12 mektepke kelesi jyldyń naýryzynda 90 jyl tolady. Sportzal munda jertólede ornalasqan. Balalar temir baspaldaqpen tómen túsýge májbúr. Al ylǵaldan qabyrǵalar kógerip ketken.
- Birshama jóndeý jumystaryn júrgizip otyrsaq ta nátıje joq. Bul balalardyń densaýlyǵyna qaýipti. Sondyqtan kógergen qabyrǵamen únemi kúresemiz, - dedi Rıdder qalalyq bilim bóliminiń basshysy Lıýbov Mıkýlskaıa.
Taǵy bir kóne ǵımarat - № 9 mektep. Bul bilim ordasy eski orys tili kabınetin sportzal qylyp amaldap otyr. 38 sharshy metrlik bólmede sportpen 240 oqýshy kezekpen aınalysady. Bólmeler oqýshylarǵa ǵana emes, ustazdarǵa da jetpeıdi. Aıadaı kabınette – eki meńgerýshi de, áleýmettik pedagog te, ınspektor da, aǵa-keńesshi de otyr. Basqa bólmede túske deıin tárbıeshi, tús aýa defektolog jumys isteıdi.
Sondyqtan da oblysta máseleni túbegeıli sheshý josparlanǵan. «Jaıly mektep» jobasy aıasynda bilim ordalary salynyp, apatty jaǵdaıdaǵy mekteptiń oqýshylary sonda kóshetin bolady.
- Rıdderde Keńes úkimeti kezinde eń sońǵy mektep 1973 jyly salynǵan. 2022 jyly №11 mektep boı kóterdi. Eskirgen mektepterdi kútip-ustap, jóndeýge tyrysamyz. Alaıda balalarymyz zamanǵa saı jaǵdaı jasalǵan mektepterde bilim alǵanyn qalaımyz. Endi mine 600 oryndyq jaıly mektep salynbaqshy. Oǵan №12 mektepten 250, №9 mektepten 240 oqýshy aýyspaq, - deıdi Lıýbov Mıkýlskaıa.
Merdigerler Shemonaıhadaǵy jaıly mektepti ýaqytynan buryn tapsyrmaq. 31 jeltoqsannyń ornyna qarashanyń ortasynda paıdalanýǵa berip qoıýy múmkin.
- Qurylys jumystary aıaqtalýǵa shaq qaldy. Mektep 95%-ǵa daıyn. Balalar jańa jyldyq erteńgilikterin eski sportzalda emes keń jańa akt zalynda qarsy alsa deımiz, - deıdi Shemonaıha aýdany ákiminiń orynbasary Baqytjan Moldahanov.
Óńirde «Jaıly mektep» ulttyq jobasy aıasynda 10 mektep salynyp jatyr. Óskemende 3, Shemonaıha men Rıdderde bir-birden, Glýbokoe aýdanynda eki mektep balalardyń ıgiligine berilmek.