ShQO-da oqý jyly aıaqtalǵan soń 26 mektep jóndeýden ótedi

ÓSKEMEN. QazAqparat –Shyǵys Qazaqstan oblysynda oqý jyly aıaqtalǵan soń 26 mektep jóndeýden ótedi, dep habarlaıdy QazAqparat tilshisi.

ShQO Bilim basqarmasy baspasóz qyzmetiniń málimetine súıensek, óńir boıynsha apatty jaǵdaıda turǵan mektep joq. Jyl saıyn jazda oqý oryndarynda jóndeý jumystary júrgiziledi.

Bıyl 3 mektep kúrdeli, 23 mektep aǵymdaǵy jóndeýden ótedi. Bul maqsatta 1,1 mlrd teńge bólingen. Qazirgi ýaqytta konkýrstyq rásimder ótkizilip, merdigerler anyqtalýda.

«Úsh mekteptiń shatyry, jylý jáne sý qubyrlary aýystyrylady. Jóndeý jumystary oqý jyly aıaqtalǵan soń birden bastalyp, qyrkúıekke deıin aıaqtalady», - deıdi basqarma basshysynyń orynbasary Dınara Shaýhına.

Oblys boıynsha barlyǵy 342 mektep bar. 2025 jylǵa deıin Shyǵys Qazaqstanda 20-ǵa jýyq jańa mektep salynbaq, onyń teń jartysy «Jaıly mektep» ulttyq jobasy aıasynda boı kóteredi.