ShQO-da «Nur Otan» praımerızine qatysýǵa 300-den astam adam nıet bildirdi

ÓSKEMEN. QazAqparat – «Nur Otan» partııasynyń ShQO boıynsha fılıaly tóraǵasynyń birinshi orynbasary Oleg Chýgýnkov óńirdegi praımerızdiń ótý barysy týraly aıtyp berdi, dep habarlaıdy QazAqparat tilshisi.

Elimizde 17 tamyzdan bastap «Nur Otan» partııasynyń praımerızine kandıdattardy tirkeý bastaldy. Úsh kún ishinde Shyǵys Qazaqstanda 309 adam tirkelip úlgerdi. Onyń ishinde 43%-dy áıelder, 26%-dy jastar quraıdy.

Praımerızge qatysýǵa nıet bildirgenderdiń 206-sy ózin-ózi usynýshylar. Bizdi partııalastardyń belsendiligi qýantty. Basty maqsat – múmkindiginshe kóp adamdy tartý bolatyn. Fılıalymyzǵa 1200-den astam qońyraý kelip tústi. Menińshe, kandıdattardyń sany budan da kóp bolady», - dedi Oleg Chýgýnkov.

Kandıdattardy tirkeý 28 tamyzǵa deıin jalǵasady. Keıin kandıdattar úgit-nasıhat jumystaryn júrgizip, debat uıymdastyryp, daýys jınaıdy.

«Jalpy, qazirgi ýaqytta ashyq jáne shynaıy ishki partııalyq saılaýdy ótkizýge barlyq jaǵdaı jasalǵan. Partııa Kóshbasshysy Nursultan Nazarbaev aıtqandaı, eń bastysy, básekege qabiletti barlyq qatysýshy arasyndaǵy teń quqyqty saqtaý. Praımerızge partııa múshelerinen bólek, elimizdiń damýyna úles qosqysy keletin árbir belsendi azamat qatysa alady. Praımerız ózekti máselelerdi qozǵap, ony sheshýge baǵyttalyp otyr. Sondyqtan biz shynaıy kóshbasshylardy kórgimiz keledi, – dedi Oleg Chýgýnkov.