ShQO-da múmkindigi shekteýli balalar arasynda shyǵarmashylyq festıval ótti

ÓSKEMEN. QazAqparat – Shyǵys Qazaqstan oblysynda bıylǵy Balalar jylyna oraı múmkindigi shekteýli baldyrǵandar arasynda shyǵarmashylyq festıval ótti, dep habarlaıdy QazAqparat tilshisi.

«Úmit oty-2022» festıvali bıyl Úrjar aýdanynda ótkizildi. Shara maqsaty – daryndy balalardy anyqtaý, jas talanttardy qoldaý jáne shyǵarmashylyǵyn shyńdaý.

Eń áýeli Semeı, Aıagóz qalalarynan, Katonqaraǵaı, Zaısan, Tarbaǵataı, Úrjar aýdandarynan 5-18 jas aralyǵyndaǵy múmkindigi shekteýli balalar irikteý kezeńinen ótti. Sodan keıin Úrjar aýdany Aqjar aýylyndaǵy Gala-kontsertke qatysyp, ózderiniń úzdik nómirlerin kórsetti.

«Memleket basshysy Qasym-Jomart Toqaev balalarǵa erekshe nazar aýdarý kerektigin, olardyń ál-aýqaty – memleketimizdiń tabysty bolashaǵynyń senimdi kepili ekendigin aıtqan edi. Balalar jyly aıasynda oblys boıynsha túrli sharalar uıymdastyrylyp jatyr. Sonyń biri bolǵan bul festıvaldi endi jyl saıyn dástúrli túrde ótkizemiz dep josparlap otyrmyz», - dedi oblystyq jumyspen qamtý jáne áleýmettik baǵdarlamalardy úılestirý basqarmasynyń basshysy Almıra Mýsınova.

Esterińizge sala ketsek, osyǵan deıin Erdoǵannyń nazaryn aýdarǵan oqýshynyń úıine Túrkııa elshiliginen qonaq kelgenin habarlaǵan edik.