ShQO-da mereke kúnderi HQO qalaı jumys isteıdi

ÓSKEMEN. QazAqparat – Shyǵys Qazaqstan oblysyndaǵy Halyqqa qyzmet kórsetý ortalyqtarynyń mamyr aıyndaǵy merekelerde qalaı jumys isteıtindigi belgili boldy, dep habarlaıdy QazAqparat tilshisi.

«Azamattarǵa arnalǵan úkimet» ShQO fılıalynyń málimetine súıensek, kelesi aıda Halyqqa qyzmet kórsetý ortalyqtary úshin 1, 2, 7, 9 jáne 10 mamyr demalys kúnderi. Dúısenbi, ıaǵnı 3 mamyrda HQO senbi kúni úshin jumys isteıdi, sondyqtan bólimder 09:00-den 15:00-ge deıin ashyq bolady.

Óskemen jáne Semeıdegi HQO azamattardy aldyn ala brondaý boıynsha qabyldaıdy. Muny tórt jolmen jasaýǵa bolady, atap aıtqanda eGov.kz portaly, eGovKzBot2.0 telegram-boty, eGov mobile mobıldi qosymshasy arqyly nemese 1414 biryńǵaı koll-ortalyǵyna qońyraý shalý arqyly. Ol úshin «HQO-da kezekti brondaýdy» qyzmetter tiziminen tańdap, jeke derekterdi toltyrý, kúnin, ýaqytyn, bólimin tańdaý jáne taǵaıyndalǵan ýaqytqa deıin 5-10 mınýt buryn kelý qajet. Brondaý jasalǵannan keıin telefonǵa SMS-habarlama keledi.

«Búgingi tańda HQKO-ǵa barmaı-aq alýǵa bolatyn qyzmetterdiń 90%-y elektrondy formatqa aýystyryldy. Eger sizge qajetti qyzmet áli onlaın qoljetimsiz bolsa, ortalyqqa kelýdi aldyn ala brondańyz. Ortalyqqa barǵan kezde mindetti túrde áleýmettik qashyqtyq pen maska rejımin saqtaý qajet», - dedi fılıal dırektory Azamat Esembýlov.

Aıta keteıik, oblystyń Halyqqa qyzmet kórsetý ortalyqtarynyń jumys tártibi dúısenbiden jumaǵa deıin 09:00-den 18.00-ge deıin, senbi kúni 09:00-den 15:00-ge deıin.