ShQO-da memlekettik qyzmetker ákimdi sotqa berdi

<p>ÓSKEMEN. KAZINFORM &mdash; Shyǵys Qazaqstan oblysynda memlekettik qyzmetker qyzmettik turǵyn úıdi óz atyna aýdaryp alǵysy kelgen. Biraq buǵan aýdan ákimi kelispedi. Sóıtip is sotqa jetken.</p>

ShQO mamandandyrylǵan aýdanaralyq ákimshilik soty baspasóz qyzmetiniń málimetine súıensek, memlekettik qyzmetker ákimniń páterdi jekeshelendirýden bas tartý týraly sheshimimen kelispeı, sotqa shaǵym túsirgen. 

Ákim bas tartý sebebin qyzmettik páter balansta turǵan memlekettik organ men qyzmetkerdiń arasynda eńbek kelisimsharty joqtyǵynan dep túsindirgen. Al talapker memlekettik qyzmettegi tájirıbesi baryn jáne ekologııalyq apat aımaǵynda turǵan adam retinde bul páterdi jekeshelendirý quqyǵyna ıe ekendigin jetkizgen.

«Talapkerdiń jalpy eńbek ótili — 40 jyl, onyń ishinde memlekettik qyzmettegi ótili — 35 jyl. «Turǵyn úı qatynastary týraly» zańǵa sáıkes, eger adamnyń mundaı tájirıbesi bolsa jáne atynda úıi bolmasa onda qyzmettik páterdi jekeshelendirýge quqyly», — delingen aqparatta.

Osylaısha, sot memlekettik qyzmetkerdiń talap aryzyn qanaǵattandyrdy. Úkim áli zańdy kúshine engen joq.

Eske salsaq, osyǵan deıin ShQO-da alaıaqtar ákimdik qyzmetkerleri atynan halyqtan aqsha surap jatqanyn habarlaǵan edik.