ShQO-da mektep esepshisi 12 mln teńge jymqyryp, qumar oıyndarǵa jumsaǵan
Aýdandyq sottyń málimetine súıensek, Kúrshimdegi orta mektepterdiń birinde esepshi bolyp jumys istegen er adam 2018 jyldyń qańtarynan 2022 jyldyń shildesine deıin aqsha jymqyryp keldi.
Ol qarajatty óziniń bank kartasyna jáne mektepte jumys istemeıtin týystarynyń shotyna aýdaryp otyrdy. Kelgen materıaldyq shyǵyn – 11,9 mln teńge.
«Aıyptalýshynyń kinási sot-ekonomıkalyq saraptamanyń qorytyndysymen, kýágerlerdiń sózderimen dáleldendi. Sottalýshy da óz kinásin tolyqtaı moıyndady. Er adam aqshany qumar oıyndarǵa jáne nesıesin óteýge jumsaǵan», - dep habarlady Kúrshim aýdandyq sotynyń baspasóz qyzmeti.
Sot sheshimimen er adam memlekettik qyzmette laýazym atqarý quqyǵynan ómir boıyna aıyrylyp, úsh jarym jylǵa túrmege qamaldy.
Úkim áli zańdy kúshine engen joq.