ShQO-da mas kúıdegi azamat 6 aılyq balasyn óltirip aldy
ShQO boıynsha Qylmystyq-atqarý júıesi departamenti baspasóz qyzmetiniń málimetine súıensek, sottalǵan M. qazirgi ýaqytta qatań rejımdegi OV 156/6 mekemesinde jazasyn óteýde. Alty aılyq balasyn óltirip alǵan er adam 10 jylǵa bas bostandyǵynan aıyrylǵan. Ol qaıǵyly oqıǵanyń qalaı bolǵanyn aıtyp berdi.
«Áıelim úıden syrtqa shyǵyp ketken edi. Al tórgi bólmede jatqan ulym aıǵaılap jylaı bastady. Balammen serýendep qaıtýdy uıǵaryp, dalaǵa bettedim. Qaıtarda jol jónekeı ishimdik satyp aldym. Úıge kelgende ony sheshindirip jatqanymda jaıalyǵynyń tolyp qalǵanyn kórdim», - deıdi sottalǵan azamat.
Onyń aıtýynsha, sodan keıin balanyń jaıalyǵyn sheship, jýyndyrdy. Alaıda vannada oramal bolmaǵandyqtan, as bólmege barǵan.
«Ulymdy qolymda ustap, súrtindirdim. As bólmeden shyǵyp bara jatqanymda dálizde jyrtylyp turǵan lınoleýmge aıaǵym ilinip ketti. Sol sátte balam qolymnan túsip ketip, shkaf pen qabyrǵa arasyndaǵy buryshqa qulady. Baspen túsken ol qabyrǵaǵa da soǵyldy. Birden ony kóterip alyp, tórgi bólmedegi dıvanǵa jatqyzdym. Kenet qyryldaǵan daýys shyǵaryp, kógere bastady. Ne isterimdi bilmeı, judyryqpen qabyrǵany urǵanymdy bilemin. Janymda uıaly telefonym da joq edi. Baspaldaq alańyna shyǵyp, kórshilerdiń esigin qaqtym. Kórshi áıel sábıdi alyp, jedel járdemge qońyraý shaldy. Sońy osylaı bolady dep esh oılamadym. Іshimdik ishkendikten bári bulyńǵyr, qas-qaǵymda boldy. Jubaıym meni keshirmedi. Ony túsinemin. Biraq men muny ádeıi istegen joqpyn», - deıdi M. esimdi sottalǵan.
Onyń aıtýynsha, kolonııaǵa túsken alǵashqy kúnderi óte aýyr boldy. Alaıda mekeme psıhologtary kómektesip, psıhokorrektsııalyq jumystar júrgizgen. Qazir ol ishimdikke táýeldilikten aryldy. Endi jazasyn ótep bolǵan soń, úıge oralyp, el qatarly jumys istegisi keledi.