ShQO-da mas kúıde shomylatyndarǵa aıyppul salynyp jatyr

ÓSKEMEN. QazAqparat – Shyǵys Qazaqstan oblysynda bıylǵy jazda sý aıdyndarynyń jaǵasynda mas kúıde júrgen 30-dan astam adam jaýapqa tartyldy, dep habarlaıdy QazAqparat tilshisi.

Oblys aýmaǵynda birneshe kún boıy qatarynan ystyq aýa raıy saqtalýda. Soǵan oraı ShQO Tótenshe jaǵdaılar departamentiniń qutqarýshylary, polıtseıler men kóliktik baqylaý ınspektsııasynyń qyzmetkerleri sý aıdyndaryndaǵy patrýldeýdi kúsheıtip, Buqtyrma sý qoımasyndaǵy shaǵyn kólemdi kemelerdegi qaýipsizdik sharalarynyń saqtalýyna reıd júrgizdi.

Belgili bolǵandaı, kóp jaǵdaıda óńir jurtshylyǵy júzý quraldary men katamarandarǵa qutqarý keýdeshelerin kımeı otyrady, shekteý belgilerinen tys jerlerge júzip ketedi, balalaryn qaraýsyz qaldyrady jáne sý aıdyndarynyń jaǵalaýynda spırtti ishimdikter ishedi.

«Jaz shyqqaly beri barlyǵy 3 myńǵa jýyq reıd júrgizildi. Sonyń nátıjesinde, 7 myńnan astam demalýshy qamtylyp, olarǵa sý aıdyndaryndaǵy tártip erejeleri túsindirildi. Bıylǵy shomylý maýsymynda batyp bara jatqan 7 adam qutqaryldy. Sý aıdyndaryndaǵy qaýipsizdik qaǵıdalaryn buzǵan 6 adam ÁQBtK-niń 412-baby boıynsha, al alkogoldi ishimdikterdi ishkeni úshin 34 adam 440-babymen jaýapqa tartyldy», - delingen aqparatta.

Aıta keteıik, maýsym aıynan beri Shyǵys Qazaqstanda 6 adam sýǵa batyp ketken.