ShQO-da MÁMS aıasynda 280 myńnan astam medıtsınalyq qyzmet kórsetildi
ShQO Aımaqtyq kommýnıkatsııalar qyzmetinde ótken baspasóz máslıhatynda «Áleýmettik medıtsınalyq saqtandyrý qory» AQ oblystyq fılıalynyń dırektory Ǵalymjan Ábilov MÁMS júıesine oraı júrgizilgen jumystardyń bir aılyq qortyndysyn aıtyp berdi.
«Bıyl óńir boıynsha ótken jylmen salystyrǵanda densaýlyq saqtaý salasyn qarjylandyrý 35 paıyzǵa artyp, 101 mlrd teńgeni qurady. Onyń ishinde 72 mlrd teńge tegin medıtsınalyq kómektiń kepildi kólemine baǵyttalsa, 29 mlrd teńge MÁMS paketine jumsalmaq. Sondaı-aq aımaqta densaýlyq saqtaý sýbektileri kóbeıip, medıtsınalyq saqtandyrý qory jetkizýshileriniń biryńǵaı bazasynda tirkelgen. Búginde mundaı 157 mekeme bar. Onyń ishinde 103-shi qormen tikeleı kelisimshartqa otyrǵan. 42 jetkizýshi mekeme jekemenshik bolsa, 61-i memlekettik», - dedi ol.
Onyń aıtýynsha, alǵashqy medıtsınalyq-sanıtarlyq kómek kórsetý basty baǵyttardyń biri. Mundaǵy maqsat – kómekke muqtaj naýqastarǵa qol ushyn berip, konsýltatıvtik-dıagnostıkalyq kómek syndy qyzmet túrlerin usyný.
«Qańtar aıynda turǵyndar konsýltatıvtik-dıagnostıkalyq keńes alý úshin dárigerlerdiń kómegine jıi júgindi. MÁMS aıasynda 280 myńnan astam medıtsınalyq qyzmet kórsetildi. Onyń ishinde 53 paıyzy dárigerlerdiń kómegine ıek artsa, 16 paıyzy ÝDZ men EKG-ǵa túsken. Al 22 paıyzy laboratorııalyq qyzmetterdi alǵan. Qalǵan 7 paıyzǵa stomatologııalyq kómek berildi», - dedi Ǵalymjan Ábilov.
Aıta keteıik, qańtar aıynda 421 shyǵysqazaqstandyq kompıýterlik tomografııa men magnıttik rezonastyq tomografııaǵa tegin túsken. 1600 naýqas MÁMS paketi boıynsha statsıonarda em qabyldady. Eki myńnan astam adamǵa statsıonardy almastyrý qyzmeti kórsetildi. Onyń ishinde naýqastardy josparly jatqyzý kórsetkishi 26 paıyzǵa artyp, shuǵyl túrde aýrýhanaǵa jatqyzý 12 paıyzǵa tómendedi. Osylaısha, emdeý men ońaltý qyzmetteri barlyq azamattarǵa qoljetimdi boldy.
Alaıda, soǵan qaramastan medıtsınalyq uıymdarda qordalanyp jatqan máseleler az emes. Mysaly, Óskemendegi balalarǵa arnalǵan stamatologııalyq emhananyń qyzmetkerlerine bıylǵy jyldyń qańtar aıynda jalaqy múldem tólenbegen. Onyń sebebin Ǵalymjan Ábilov bylaı dep túsindirdi. «Naýqastarǵa kórsetilgen qyzmet túrleri aqparattyq júıege qate engizilgen. Sonyń saldarynan tólem júıesinde olqylyqtar oryn aldy. Qazir tıisti jumystar atqarylyp, bul másele sheshimin tapty», - dedi ol.
Taıaýda Óskemendegi balalarǵa arnalǵan stamatologııalyq emhananyń qyzmetkerlerine jalaqy tólenetin bolady.