ShQO-da mamandar 28 eldi mekendi sý basý qaýpiniń aldyn aldy

<p>ASTANA. KAZINFORM &ndash; Shyǵys Qazaqstan oblysynyń &laquo;Qazsýshar&raquo; fılıaly 37 myńnan astam turǵyny bar 28 eldi mekendi sý basý qaýpiniń aldyn aldy. Bul týraly Sý resýrstary jáne ırrıgatsııa mınıstrliginiń resmı ókili Móldir Ábdýalıeva aıtyp berdi.</p>

«Sý qoımalarynda tasqyn sýyn qabyldaý úshin aldyn ala bos oryn daıyndalyp, sýdy ózenderge burý maqsatynda 10 bóget salyndy. Sondaı-aq, sýdy arnalar arqyly burý sharalary uıymdastyryldy. Jalpy uzyndyǵy 20 shaqyrym bolatyn 10 magıstraldyq kanal mehanıkalyq ádispen tazalandy», - dedi Móldir Ábdýalıeva Ortalyq kommýnıkatsııalar qyzmetinde ótken baspasóz máslıhatynda.

Búgingi tańda elimizdiń ońtústigi men batysynda sýarý maýsymyna qarqyndy daıyndyq júrip jatyr. Mınıstrlik aýylsharýashylyq alqaptaryna sý berýdi jaqsartý úshin alty aımaqta sýarý arnalaryn tazartady.

Atap aıtqanda, D.Qonaev atyndaǵy Úlken Almaty kanalynyń sýarý jelileri, sondaı-aq Batys Qazaqstan, Shyǵys Qazaqstan, Qyzylorda, Túrkistan jáne Jetisý oblystaryndaǵy sýarý arnalary tazartylyp jatyr.

«Bıyl josparlanǵan 564 shaqyrymnyń 390 shaqyrymnan astamy tazartyldy, sondaı-aq Qazaqstannyń 8 óńirinde: Jetisý, Almaty, Jambyl, Qyzylorda, Qaraǵandy, Túrkistan oblystarynda, BQO jáne ShQO-da 74 gıdrotehnıkalyq qurylysty jóndeý josparlanǵan», - dedi spıker.