ShQO-da qyrkúıek aıynan 600-den astam oqýshy koronavırýs juqtyrdy
Qazirgi ýaqytta oblys vırýs juqtyrý kórsetkishi boıynsha «sary» aımaqta tur. Eń kóp syrqattanǵandar Semeı jáne Óskemen qalalarynda tirkelgen. Qaýipti dert balalardy da aınalyp ótpedi.
ShQO Bilim basqarmasynyń málimetinshe, bıylǵy oqý jylynyń basynan beri óńirde 660 oqýshy vırýsqa shaldyqqan. Búginde 586 bala saýyǵyp, ádettegi oqý rejımine oraldy. Alaıda oblystyń 55 mektebindegi 108 synyp áli kúnge deıin qashyqtan oqytýda.
- Koronavırýsty jeńýdiń jalǵyz joly - vaktsına alý jáne ujymdyq ımmýnıtetti qalyptastyrý. 20 qazanda Qazaqstannyń Bas memlekettik sanıtarlyq dárigeri jańa qaýlysyn jarııalady. Soǵan sáıkes Pfizer Comirnaty preparatymen vaktsınalaý jónindegi ádistemelik usynymdar bekitildi. Bul ekpeni 12 jastan asqan jasóspirimderge jáne júkti áıelderge salý josparlanýda, - deıdi Shyǵys Qazaqstannyń bas pedıatry Gúl Qusaıynova.
Onyń aıtýynsha, balalar men júkti áıelderdi vaktsınalaý osy jyldyń qarasha aıynan bastalady. Áıelder júktiliktiń 16-dan 37-shi aptasyna deıin erikti túrde ekpe saldyra alady. Al jasóspirimderdi ımmýndaý kezeń-kezeńmen júrgiziledi. Birinshi kezeńde 16-dan 18 jasqa deıingi jasóspirimder vaktsına almaq. Kelesi kezeńde vaktsınalaýǵa 12-den 15 jasqa deıingi balalar jiberiledi.
Oqýshylarǵa ekpe ata-analardyń nemese zańdy ókilderdiń kelisimi bolǵan jaǵdaıda ǵana salynady. Qazirgi ýaqytta oblystyń medıtsınalyq uıymdarynda ımmýndaýǵa jatatyn jasóspirimderdiń tizimin jasaý boıynsha jumys bastaldy.