ShQO-da qujattary talapqa saı emes 3 kópqabatty úıdiń qurylysy toqtatyldy
Oblystyq Memlekettik sáýlet-qurylys baqylaý basqarmasynyń habarlaýynsha, óńir boıynsha tek eki turǵyn úı kesheni úleskerlerdiń qarajatyn tartýǵa quqyly. Atap aıtqanda, «Janym» jáne «Sparkle Diamond» turǵyn úı keshenderi.
«Búgingi tańda tórt turǵyn úı kesheniniń qurylys jumystaryna qajetti qujattary tolyq emes. Sondyqtan onyń ishindegi úsh keshenniń qurylysy toqtatyldy. Taǵy eki turǵyn úıde jobalyq-smetalyq qujattamadan aýytqýlar anyqtaldy», - delingen aqparatta.
Tekserý barysynda «Emeralds» turǵyn úı keshenin salýshy «ROYAL FINANCE GROUP» JShS-nyń zań talabyn buzǵany anyqtaldy.
«Ruqsat qujattary joq bolǵanyna qaramastan kompanııa úleskerlerdiń qarajatyn tartýmen aınalysqan. Qazirgi tańda basqarma mamandary úleskerlerdiń múddesin qorǵap, «Emeralds» turǵyn úı kesheni qurylysynyń zańdy túrde aıaqtalýyn qamtamasyz etý sharalaryn qoldanbaq», - delingen málimette.
Eske salsaq, osyǵan deıin ShQO-da apatty jaǵdaıda turǵan úıdiń turǵyndary ákimdikke shaǵymdanǵany habarlanǵan.