ShQO-da qutqarýshylar arasynda Qazaqstan chempıonaty aıaqtaldy

ÓSKEMEN. QazAqparat – Shyǵys Qazaqstan oblysynda qutqarýshylar arasynda Qazaqstan chempıonaty máresine jetti, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, Óskemen qalasynda órt sóndirý-qutqarý sporty boıynsha Qazaqstan chempıonaty aıaqtaldy. Úsh kúnge sozylǵan jarys tartysqa toly boldy.

Chempıonattyń ashylýyna QR Tótenshe jaǵdaılar mınıstri ıÝrıı Ilın qatysqan. Respýblıkanyń barlyq aımaqtarynan 19 komanda baq synasty. Erler, áıelder jáne jasóspirimder quramalary kedergilermen júz metrge júgirý, munaranyń 4-qabatynyń terezesine satymen kóterilý boıynsha saıysqa tústi.

«Jarystyń sáni áıelder komandalary boldy. Ásirese, Qazaqstannyń jańa rekordyn ornatqan Qostanaı qalasynan kelgen Aınur Bajevanyń kórsetkishi talaıdy tańqaldyrdy. Aldymen Aınur kedergilermen júz metrdi 17,36 sekýndta júgirip ótti. Sodan keıin 17,21 jáne sheshýshi sátte mejeni 16,97 sekýndta baǵyndyrdy», - delingen aqparatta.

Qorytyndylaıtyn bolsaq, erler arasyndaǵy komandalyq jarystardyń nátıjesi:

1 oryn - Atyraý oblysy,

2 oryn – Nur-Sultan qalasy,

3 oryn - Mańǵystaý oblysy.

Áıelder arasyndaǵy komandalyq jarystardyń nátıjesi:

1 oryn - Nur-Sultan qalasy,

2 oryn - Túrkistan oblysy,

3 oryn - Aqmola oblysy.

Jasóspirimder arasyndaǵy komandalyq jarystardyń nátıjesi:

1 oryn - Shyǵys Qazaqstan oblysy,

2 oryn - Aqtóbe oblysy,

3 oryn – Batys Qazaqstan oblysy.

Esterińizge sala ketsek, osyǵan deıin ShQO-da qutqarýshylar arasynda Qazaqstan chempıonaty bastalǵandyǵy habarlanǵan. https://kaz.inform.kz/news/shko-da-kutkarushylar-arasynda-kazakstan-chempionaty-bastaldy_a3903041